“Foreign Policy” jurnalının dərc etdiyi analitik məqalədə bildirilir ki, Ukraynada davam edən hərbi münaqişəyə və Qərb dövlətlərinin Moskvanı diplomatik təcridə salmaq cəhdlərinə baxmayaraq, Rusiya Federasiyası yüksək səviyyəli beynəlxalq iqtisadi və siyasi platformalarda fəal iştirakını sürətlə davam etdirir.
Nəşr vurğulayır ki, Ukraynadakı müharibənin uzanmasına baxmayaraq, “Rusiya beynəlxalq müstəvidə təcrid olunmaqdan çox uzaqdır”. Məqalədə diqqətə çatdırılır ki, Rusiyanın maliyyə naziri Anton Siluanov bu yaxınlarda ABŞ-da keçirilən G20 maliyyə nazirləri sammitində şəxsən iştirak edib və tədbir çərçivəsində ABŞ-ın maliyyə naziri Skott Bessent (Scott Bessent) ilə ikitərəfli danışıqlar aparıb.
Analitik nəşr, həmçinin Moskva rəhbərliyinin Qırğızıstanın paytaxtı Bişkekdə keçirilən Şanxay Əməkdaşlıq Təşkilatının (ŞƏT) Dövlət Başçıları Şurasının sammitindəki fəal rolunu xüsusi qeyd edib. Sammitin yekununda Rusiya Prezidenti Vladimir Putinin imzaladığı bəyannamədə ABŞ və İsrailin İrana, eləcə də Yaxın Şərqdə Tehrana yaxın qüvvələrə qarşı hərbi əməliyyatları kəskin pislənilib. Sənəddə eyni zamanda Qərbin ŞƏT üzvü olan ölkələrə, o cümlədən Rusiyaya qarşı tətbiq etdiyi birtərəfli sanksiyaların yolverilməz olduğu vurğulanıb.
Parallel olaraq, jurnal Rusiyanın Vladivostok şəhərində keçirilən Şərq İqtisadi Forumunu Moskva diplomatiyasının növbəti uğuru kimi qiymətləndirir. Asiya-Sakit Okean regionu ölkələri arasında ticarət dövriyyəsinin artırılması, xarici investisiyaların cəlb olunması və regional əməkdaşlığın inkişafı mövzularına həsr olunmuş tədbirə 80-dən çox ölkənin nümayəndə heyəti qatılıb.
İzmedia.az
