Konqo Demokratik Respublikasında (KDR) sürətlə yayılan Ebola virusu epidemiyası nəticəsində laboratoriya şəraitində təsdiqlənmiş ölüm hallarının sayı 3 007 nəfərə çatıb. Bu barədə KDR-in Rabitə və Media Nazirliyi rəsmi məlumat yayıb.
Rəsmi statistikaya əsasən, son 24 saat ərzində ölkədə 86 yeni yoluxma və 57 ölüm halı qeydə alınıb. Bununla da ümumi yoluxanların sayı 6 186-ya yüksəlib. Epidemiyanın başlanğıcından bəri xəstəlikdən ölüm nisbəti 48,6% təşkil edir. Hazırda xəstəlik simptomları olan 830-a yaxın şəxs xəstəxanalarda və xüsusi karantin mərkəzlərində müalicə olunur. Səhiyyə qurumları xəstələrlə təmasda olan şəxslərin 88%-ni nəzarət altında saxlayır.
Mayın 15-də KDR və Uqandada başlayan bu epidemiya Afrika qitəsində Ebola nəzarəti tarixində ikinci ən ölümcül xəstəlik dalğasına çevrilib. Virusa artıq Konqonun 6 əyalətində rast gəlinib və epidemiya episentri İturi əyaləti hesab olunur. Qonşu Uqanda hakimiyyəti iyulun 28-də ölkədə epidemiyanın başa çatdığını bəyan edib, Ümumdünya Səhiyyə Təşkilatı (ÜST) isə avqustun 25-də bu məlumatı rəsmən təsdiqləyib.
Nadir virus ştamı və peyvəndləmə
Mütəxəssislər bildirirlər ki, hazırkı epidemiyaya nadir görülen “Bundibugyo ebolavirus” ştamı səbəb olub və bu növə qarşı hazırlanan peyvənd hələ də klinik sınaq mərhələsindədir. Vəziyyətin kritikliyini nəzərə alaraq, keçən həftədən etibarən KDR risk qrupunda olan əhaliyə başqa bir patogen – “Zaire ebolavirus”a karşı effektivliyini sübut etmiş peyvəndlərin vurulmasına başlayıb.
Məlumat üçün bildirək ki, tarixdə ən böyük Ebola epidemiyası 2014-2016-cı illərdə Qərbi Afrikada (Qvineya, Liberiya və Syerra-Leone) baş verib və 11 mindən çox insanın həyatına son qoyub. Vəhşi heyvanlardan insanlara keçən Ebola infeksiyası ilk dəfə 1976-cı ildə məhz indiki KDR ərazisində aşkar olunub. Hazırkı alovlanma ölkə tarixində qeydə alınan 17-ci Ebola epidemiyasıdır.
İzmedia.az
