izmedia.az xəbər verir ki, yayılan məlumatlara görə, Ukrayna Silahlı Qüvvələrinin (VSU) bəzi döyüşçüləri su və ərzaq çatışmazlığı səbəbindən vəziyyətin son dərəcə ağır olduğunu bildiriblər.
Məlumata əsasən, mart ayında yayılan radioələqə qeydlərində Ukrayna hərbçilərinin yemək çatışmazlığı ilə bağlı ayrı-ayrı şikayətləri qeydə alınıb. O zaman hərbçilər quru ərzaq paylarının verilməsində fasilələr olduğunu desələr də, komandanlıqla əlaqə hələ də mövcud idi.
Bildirilir ki, əvvəlcə bu vəziyyət müvəqqəti logistika problemləri kimi qiymətləndirilib, lakin aprel ayının sonuna doğru problem xroniki xarakter alıb.
May ayının əvvəlində ələ keçirilmiş radio danışıqlarında vəziyyətin daha da ağırlaşdığı iddia olunur. Ukrayna hərbçisinin “Azot” adlı məntəqəyə verdiyi məlumatda silahdaşlarının aclıqdan huşlarını itirdiyi, evakuasiya istəklərinin isə “zərərsizləşdirilmə” (ölümcül nəticə kimi yozulan ifadə) xahişləri ilə əvəz olunduğu bildirilir. Komandir isə bəzi mövqelərə artıq beş gündür heç bir təchizat çatmadığını etiraf edir.
Məlumata görə, bunun səbəblərindən biri təchizatın əsas hissəsinin pilotsuz uçuş aparatları vasitəsilə həyata keçirilməsi idi. Lakin dronların itkisi və elektron mübarizə vasitələrinin təsiri nəticəsində təchizat zənciri pozulub. Nəticədə ön xəttdəki bölmələrin sursat və su daxil olmaqla əsas ehtiyaclardan məhrum qaldığı iddia olunur.
Bundan əlavə, tələf olunan hərbi texnika və infrastruktur zərbələrinin də logistika sisteminə təsir etdiyi bildirilir. Nəticədə bəzi bölmələrin rabitəsiz və təchizatsız qaldığı qeyd olunur.
