İran Futbol Federasiyası ABŞ-nin ev sahibliyi etdiyi futbol oyunlarını oynamayacağına qətiyyətlə inanır, lakin 2026-cı il FIFA Dünya Kubokunu tamamilə boykot etmək istəmir.
İzmedia.az xəbər verir ki, bu barədə Reuters agentliyi cümə axşamı İran futbol qurumunun prezidenti Mehdi Taca istinadən məlumat verib.
Agentlik Tacın sözlərini sitat gətirib:
“Biz Amerikanı boykot edəcəyik, amma Dünya Kubokunu boykot etməyəcəyik”.
Fars Xəbər Agentliyi həftənin əvvəlində İran futbolunun rəhbəri Tacın sözlərinə istinadən bildirib:
“Milli komanda Türkiyədə təlim-məşq toplanışı keçirir və orada iki yoldaşlıq oyunu da keçirəcəyik”.
Martın 11-də İranın idman naziri Əhməd Donyamali İran milli futbol komandasının 2026-cı il FİFA Dünya Kubokundan kənarda qalacağını bildirib. Lakin martın 16-da Asiya Futbol Konfederasiyasının (AFC) baş katibi Vindzor Con İran tərəfindən qarşıdan gələn Dünya Çempionatında iştirakdan imtina ilə bağlı heç bir rəsmi bildirişin olmadığını açıqlayıb.
2026-cı il FIFA Dünya Kuboku 11 iyun – 19 iyul tarixləri arasında Kanada, Meksika və ABŞ tərəfindən birgə ev sahibliyi ediləcək. Oyunlar üç ölkənin 16 şəhərində keçiriləcək. Bu, əvvəlki 32 komandalı format əvəzinə 48 komandanın iştirak etdiyi ilk FIFA Dünya Kuboku olacaq.
İzmedia.az
