Fox News telekanalı ABŞ rəsmilərinə istinadən bildirib ki, Vaşinqton İrana qarşı genişmiqyaslı hərbi əməliyyatların bərpasına daha da yaxınlaşıb.
Məlumata görə, bu qiymətləndirmə İranın ABŞ gəmilərinə atəş açması və Birləşmiş Ərəb Əmirliklərinə raket və pilotsuz uçuş aparatları ilə hücumlar həyata keçirməsindən sonra verilib.
Rəsmilər qeyd ediblər ki, “son 24 saatda vəziyyət əvvəlkindən daha gərgindir” və bu, ABŞ-ın “Azadlıq Əməliyyatı” çərçivəsində mümkün hərbi eskalasiyanı gündəmə gətirir. Bununla belə, yekun qərarın ABŞ Prezidenti Donald Trampa məxsus olduğu vurğulanıb.
Eyni zamanda ABŞ Mərkəzi Komandanlığının (CENTCOM) Yaxın Şərq üzrə rəhbəri admiral Bred Kuper bildirib ki, əməliyyat çərçivəsində ABŞ Hərbi Dəniz Qüvvələri ticarət gəmilərinə hücum etdiyi iddia olunan altı İran sürət qayığını məhv edib.
ABŞ Müdafiə Nazirliyinin sözçüsü isə qeyd edib ki, sahədəki komandirlər özlərini və kommersiya gəmiçiliyini qorumaq üçün geniş səlahiyyətlərə malikdirlər. Onun sözlərinə görə, təhlükə yaradan hədəflərə qarşı dərhal müdaxilə qərarı verilə bilər.
Rəsmilər həmçinin vurğulayıblar ki, ABŞ təhlükəni gözləmədən qarşısını almaq hüququnu saxlayır və “İranın əvvəlcə hücum etməsini gözləmək məcburiyyətində deyil”.
İzmedia.az
