Moskva beynəlxalq tədbirlər çərçivəsində yüksək səviyyəli görüşlərin təşkili ilə bağlı Tokiodan heç bir rəsmi sorğu almayıb. Bununla belə, Rusiya Xarici İşlər Nazirliyi belə təklifləri nəzərdən keçirməyə hazır olduğunu bildirib. Bu barədə Rusiya Xarici İşlər Nazirliyinin sözçüsü Mariya Zaxarova mətbuat brifinqində açıqlama verib.
“Rəsmi olaraq beynəlxalq toplantılar çərçivəsində Rusiya və Yaponiya arasında yüksək səviyyəli görüşlərin keçirilməsi ilə bağlı Tokiodan heç bir müraciət daxil olmayıb. Əlbəttə ki, belə bir sorğu olarsa, diqqətlə nəzərdən keçiriləcək”, – deyə Zaxarova bildirib.
O, yapon siyasətçi Muneo Suzukinin Moskvaya səfəri zamanı ASEAN tədbirləri çərçivəsində Manilada Rusiya və Yaponiya xarici işlər nazirləri arasında görüş təşkil olunması ilə bağlı səsləndirdiyi təklifə münasibət bildirib.
Zaxarova vurğulayıb ki, hərtərəfli dövlətlərarası dialoqun bərpası Yaponiyanın Rusiyaya qarşı hazırkı siyasətindən uzaqlaşmaq istəyindən asılıdır.
“Yaponiya həm sözlə, həm də əməli şəkildə Rusiyaya qarşı düşmən mövqedən imtina etməlidir. Yalnız bundan sonra mənalı qarşılıqlı fəaliyyət üçün şərait yarana bilər”, – deyə diplomat qeyd edib.
Onun sözlərinə görə, bu mövqe mayın 4-də Yaponiya parlamentinin yuxarı palatasının üzvü Muneo Suzuki ilə Rusiya Xarici İşlər Nazirliyi nümayəndələri arasında keçirilən görüş zamanı da çatdırılıb.
İzmedia.az
