Yeni Zelandiyada “Forrest Field” özəl aerodromunun yaxınlığında helikopterin qəzaya uğraması nəticəsində bir nəfər həlak olub.
Hadisə çərşənbə axşamı yerli vaxtla saat 17:20 radələrində Kraystçörç (Christchurch) şəhərindən təxminən 30 kilometr şimal-qərbdə yerləşən Eyrvell (Airwell) yaşayış məntəqəsi yaxınlığında baş verib. Polis sözçüsü Den Overend jurnalistlərə açıqlamasında bildirib: “Helikopterin göyərtəsində olan yeganə şəxs — pilot aldığı xəsarətlərdən hadisə yerindəcə dünyasını dəyişib”.
Açıqlamaya əsasən, hava nəqliyyat vasitəsi aerodromdan bir neçə yüz metr kənarda yerləşən açıq sahəyə çırpılıb. Hüquq-mühafizə orqanlarının əməkdaşları qəza ərazisini mühasirəyə alıblar. Bölgədə havanın qaralması ilə əlaqədar olaraq, hadisə yerində əsas istintaq-əməliyyat tədbirlərinin çərşənbə günü səhər saatlarında davam etdirilməsi planlaşdırılır.
Hələlik helikopterin modeli, həlak olan pilotun şəxsiyyəti və qəzanın başvermə səbəbləri barədə rəsmi təfərrüatlar açıqlanmayıb.
İzmedia.az
