Avstriyalı kosmonavt Franz Viehböck Yer kürəsinin ilk kosmonavtı Yuri Gagarinin həyat yoldaşı Valentina Gagarina ilə bağlı illər sonra diqqətçəkən bir xatirəsini bölüşüb.
Valentina Qaqarina ilə ilk dəfə 1993-cü ildə Vyanada keçirilən astronavtlar konqresində tanış olduğunu deyən Fibek bildirib ki, tədbir Kosmik Uçuş İştirakçıları Assosiasiyası tərəfindən təşkil edilib və təşkilatçılardan biri də məhz özü olub.
Kosmonavtın sözlərinə görə, Valentina Qaqarina çox sakit və utancaq davranırdı. Buna görə də o, vaxtaşırı yaxınlaşıb özünü necə hiss etdiyini soruşurdu.
Konqresin son günü rəqs gecəsi təşkil olunub. Fibek tərəddüd etsə də, onu rəqsə dəvət etmək qərarına gəlib. Gözlənilmədən Valentina Qaqarina bu təklifi qəbul edib.
Franz Fibek etiraf edib ki, həmin an onun yaddaşında xüsusi yer tutub. O bildirib ki, axşam boyu Qaqarinanın özünü daha rahat hiss etdiyini və tədbirdən zövq aldığını görmək onu sevindirib.
Fibek özü 1991-ci ildə sovetlərin Mir orbital stansiyasına yeganə kosmik uçuşunu həyata keçirib. Onun heyətində sovet kosmonavtları Alexander Volkov və Toktar Aubakirov da yer alıblar.
Avstriyalı kosmonavt orbitdə təxminən səkkiz gün keçirərək kosmik tibb, fizika və kosmik texnologiyalar sahəsində elmi təcrübələr aparıb. Bu günə qədər həmin missiya Avstriya vətəndaşı üçün ilk və yeganə kosmik uçuş olaraq qalır.
