Fitch Ratings agentliyinin qiymətləndirməsinə görə, Ermənistanda keçirilən parlament seçkilərinin nəticələri ölkənin hazırkı siyasi kursunun davam edəcəyini göstərir. Agentlik hesab edir ki, bu, Ermənistanın Qərblə yaxınlaşmasını və Azərbaycanla sülh prosesində irəliləyişi sürətləndirə bilər.
İlkin nəticələrə əsasən, Baş nazir Nikol Paşinyanın rəhbərlik etdiyi Vətəndaş Müqaviləsi Partiyası səslərin 49,8 faizini toplayaraq parlamentdə çoxluğu təmin edib. Bununla belə, partiya Konstitusiyaya birtərəfli dəyişiklik etmək üçün tələb olunan üçdə iki səs çoxluğunu əldə edə bilməyib.
Fitch qeyd edir ki, Ermənistan Azərbaycanla sülh sazişindən və Türkiyə ilə münasibətlərin normallaşmasından iqtisadi baxımdan əhəmiyyətli fayda əldə edə bilər. Nəqliyyat dəhlizlərinin açılması ölkənin regional ticarət və tranzit imkanlarını genişləndirə bilər.
Bununla yanaşı, agentlik Ermənistan iqtisadiyyatının əsas risk mənbəyinin Rusiyadan yüksək asılılıq olduğunu vurğulayıb. Ölkənin idxal etdiyi təbii qazın 85-90 faizi Rusiyadan alınır və ixracın 35 faizi bu ölkənin payına düşür.
Fitch Ermənistanın suveren kredit reytinqini “BB-” səviyyəsində saxlayıb və növbəti reytinq icmalının iyulun 10-da keçiriləcəyini açıqlayıb.
İzmedia.az
