Rusiya xarici işlər nazirinin müavini Sergey Rıabkov “NEWS.ru” portalanına verdiyi müsahibədə Moskva ilə Vaşinqton arasındakı mövcud təmaslar və Ukrayna münaqişəsinin həlli perspektivləri haqqında danışıb. Rıabkov bildirib ki, Rusiya ABŞ ilə dialoqa açıqdır, lakin bu, ölkənin prinsipial mövqelərindən geri çəkilməsi kimi qiymətləndirilməməlidir.
Diplomatın sözlərinə görə, Donald Tramp administrasiyası dövründə Amerika tərəfi konstruktiv müzakirələrə hazır olduğunu və Rusiyanın arqumentlərini anladığını nümayiş etdirir. Rıabkov qeyd edib ki, hazırkı mərhələdə əsas məsələ Vaşinqtonun Kiyev və onun Avropadakı müttəfiqlərinə nə dərəcədə təsir göstərə bilməsidir.
ABŞ Dövlət katibi Marko Rubionun sülh nizamlanması üçün yeni ideyaların zəruriliyi barədə fikirlərinə toxunan Rıabkov, Rusiyanın yalnız real vəziyyəti əks etdirən və Prezident Vladimir Putinin müəyyən etdiyi məqsədlərə uyğun gələn sağlam təklifləri dinləməyə hazır olduğunu vurğulayıb. O, Aİ və Ukraynanın maksimalist tələblərinin, eləcə də Ukrayna Silahlı Qüvvələrinin yenidən silahlanması üçün vaxt qazanmaq cəhdlərinin Moskva üçün tamamilə qəbuledilməz olduğunu diqqətə çatdırıb.
İzmedia.az
