Cənubi Sakit Okeanda, Norfolk adasının şimalında 16 metrlik “Tai Tam” yaxtası bir qrup kaşalotun (spermatoset balinası) hücumuna məruz qalaraq batıb. Gəmidə olan iki avstraliyalı, bir yeni zelandiyalı və bir fransız dənizçi təxminən 18 saatlıq gərgin gözləmədən sonra sağ-salamat xilas edilib.
“New York Post” qəzetinin məlumatına görə, insident gecə saatlarında baş verib. Sükan arxasında olan Gemma Kuper güclü zərbədən sonra gəminin kənara atıldığını və ərazidə 6-8 kaşalotdan ibarət dəstənin olduğunu bildirib. İntensiv zərbələr nəticəsində yaxtanın sağ bortunun sükan mexanizmi sıradan çıxıb, şüşə lifli korpus çatlayıb və içəriyə su dolmağa başlayıb.
Ekipaj üzvü, fransız Martin Joffre gövdəni daxildən və sudan yoxlayaraq dəlikləri köməkçi vasitələrlə bağlamağa çalışsa da, su axınının qarşısını almaq mümkün olmayıb. Dənizçilər Yeni Zelandiya vaxtı ilə saat 13:00-da təcili qəza siqnalını (EPIRB) işə salıblar.
Gəminin batacağını anlayan heyət gecə saatlarında xilasetmə salına keçib və batmaqda olan yaxtanın onları da dərinliyə çəkməməsi üçün bağlayıcı ipi kəsib. Hadisədən 18 saat sonra dənizçilər 143 metrlik “MV Sofrana Surville” konteyner gəmisi tərəfindən xilas edilərək göyərtəyə qaldırılıblar. Ekipaj üzvlərindən heç kim xəsarət almayıb.
Xilasetmə Koordinasiya Mərkəzinin rəhbəri Mayk Klulov əməliyyatın yüksək peşəkarlıqla əlaqələndirildiyini qeyd edərək, heyətin vaxtında qəza mayakını işə salmasını həyat xilas edən əsas amil kimi dəyərləndirib.
İzmedia.az
