İran Parlamentinin sədri Məhəmməd Bağır Qalibaf dövlət televiziyasında yayımlanan müraciətində bəyan edib ki, ABŞ və İsraillə baş verən hərbi münaqişə dövründə İran Silahlı Qüvvələrinin döyüş qabiliyyəti, atəş gücü və hava hücumundan müdafiə imkanları əhəmiyyətli dərəcədə güclənib. Qalibaf vurğulayıb ki, Tehran Vaşinqtonun və müttəfiqlərinin regiondakı məqsədlərinə çatmasına imkan verməmək üçün kifayət qədər çəkindirici gücə malikdir və vəziyyət tələb edəcəyi təqdirdə ölkə bütün resursları ilə döyüşməyə hazırdır.
Spiker qeyd edib ki, Vaşinqtonla diplomatik təmaslar və danışıqlar davam etsə də, ABŞ-ın verdiyi vədlərə əməl etməməsi səbəbindən imzalanacaq hər hansı saziş təhlükəsizliyə tam zəmanət vermir. Onun sözlərinə görə, İran yalnız hərbi sahədə əldə etdiyi üstünlükləri siyasi masada möhkəmləndirməklə və düşmənə qarşı ardıcıl hücum hazırlığını qorumaqla davamlı çəkindirməyə nail ola bilər. Qalibaf ABŞ-ın davranışını dəyişməli və Tehranın qanuni tələblərini qəbul etməli olduğunu bildirərək, ikinci Amerika hücumunun qarşısını almağın əsas strateji vəzifə olduğunu vurğulayıb.
İzmedia.az
