Xarici işlər naziri Hakan Fidan İslam Əməkdaşlıq Təşkilatının (İƏT) Xarici İşlər Nazirləri Toplantısında iştirak etmək üçün həftə sonu İraqın paytaxtı Bağdadda olacaq.
izmedia.az xəbər verir ki, xarici İşlər Nazirliyindəki mənbələrdən əldə edilən məlumata görə, Türkiyə şənbə və bazar günləri keçiriləcək toplantıda İƏT-in dövr sədrliyini İraqa təhvil verəcək.
GÖRÜŞÜN MÖVZUSU: DİALOQ VƏ HƏMRƏYLİK
“Sülhün və Davamlı İnkişafın Təşviqi üçün İki Əsas Sütun: Dialoq və Həmrəylik” mövzusu ilə keçiriləcək toplantıda İslam dünyası ilə bağlı kritik mövzular müzakirə olunacaq.
QƏZZƏDƏ SOYQIRIM SİYASƏTLƏRİ VƏ FƏLƏSTİNDƏKİ İŞĞAL GÜNDƏMDƏDİR
İclasda İsrailin Qəzzada davam edən soyqırım siyasətləri, Fələstin torpaqlarında işğal və ilhaq fəaliyyətlərinin müzakirə ediləcəyi gözlənilir.
İslam dünyasının digər münaqişə zonalarında baş verən hadisələr, terrorla mübarizə, BMT-də islahatların aparılması zərurəti və islamofobiya ilə mübarizə də toplantının gündəmində olacaq.
Həmçinin İƏT-ə daxil olmayan ölkələrdə yaşayan müsəlman icmalarının vəziyyətinin qiymətləndirilməsi də nəzərdə tutulur.
BAĞDAD BƏYANNAMƏSİNİN QƏBUL EDİLMƏSİ GÖZLƏNİR
Görüşün sonunda “Bağdad bəyannaməsi”nin qəbul ediləcəyi gözlənilir.
Səfər çərçivəsində xarici işlər naziri Hakan Fidanın iclasda çıxışı və həmkarları ilə ikitərəfli görüşlər keçirməsi planlaşdırılır.
