Moskva Ukrayna münaqişəsinin həlli ilə bağlı 2022-ci ildə İstanbulda əldə olunan razılaşmaların hazırkı şəraitdə aktual olmadığını hesab edir.
İzmedia.az xəbər verir ki, bunu Rusiya Prezidentinin mətbuat katibi Dmitri Peskov TASS agentliyinə bildirib.
Onun sözlərinə görə, həmin sənədlər artıq mövcud vəziyyətin tələblərinə cavab vermir. “Reallıq tamamilə dəyişib”, – deyə Peskov qeyd edib.
Rusiya və Ukrayna arasında münaqişənin həlli üzrə danışıqlar xüsusi hərbi əməliyyatın başlanmasından dərhal sonra – 2022-ci ilin fevral ayının sonunda start götürüb. Tərəflər əvvəlcə Belarusda, daha sonra isə İstanbul şəhərində bir neçə görüş keçiriblər.
Danışıqlarda Rusiya nümayəndə heyətinə prezidentin köməkçisi Vladimir Medinski, Ukrayna nümayəndə heyətinə isə Ali Radada “Xalqın Xidmətçisi” fraksiyasının sədri David Araxamiya rəhbərlik edib. İstanbul danışıqları nəticəsində Ukraynanın neytral və bloklara qoşulmayan statusu ilə bağlı öhdəlikləri ehtiva edən saziş layihəsinin ilkin variantı hazırlanmışdı. Lakin sonradan bütün razılaşmaların Kiyev və onun Qərb müttəfiqləri tərəfindən pozulduğu iddia edilir. Bu prosesdə Böyük Britaniyanın keçmiş baş naziri Boris Johnsonun mühüm rol oynadığı bildirilir.
2025-ci ildə danışıqlar yenidən bərpa olunub və İstanbulda üç raund görüş keçirilib. Tərəflər münaqişənin başlanmasından bəri ən böyük əsir mübadiləsi də daxil olmaqla bir sıra humanitar məsələlər üzrə razılığa gəlsələr də, münaqişənin siyasi həlli ilə bağlı fundamental razılaşma əldə olunmayıb.
2026-cı ildə isə danışıqlar üçtərəfli formatda – Rusiya, Ukrayna və ABŞ nümayəndələrinin iştirakı ilə davam etdirilib. Nümayəndə heyətləri 17–18 fevral tarixlərində Cenevrə şəhərində görüş keçiriblər. Danışıqların ilk günü təxminən altı saat, ikinci günü isə iki saata yaxın davam edib.
Vladimir Medinski bu görüşləri “çətin, lakin işgüzar” adlandırıb və yaxın vaxtlarda yeni görüşün keçiriləcəyini bildirib.
İzmedia.az
