ABŞ-nin vitse-prezidenti C.D. Vens Fox News-a müsahibəsində bildirib ki, ABŞ və İran Pakistanın paytaxtı İslamabadda keçirilən son görüş zamanı ciddi irəliləyiş əldə ediblər.
O, danışıqlarda nəyin səhv getdiyi ilə bağlı sualı cavablandıraraq deyib: “Mən sadəcə işlərin səhv getdiyini deməzdim. Əksinə, düşünürəm ki, işlər düzgün istiqamətdə gedib və biz böyük irəliləyiş əldə etmişik”.
Vens əlavə edib ki, ABŞ və İran rəsmilərinin bu qədər yüksək səviyyədə görüşməsi nadir haldır: “Düşünürəm ki, bu, İranın hazırkı rəhbərliyi dövründə ilk belə yüksək səviyyəli görüşlərdən biridir. Bu, müsbət inkişafdır və danışıqlarda irəliləyiş əldə olunub”.
Onun sözlərinə görə, növbəti mərhələdə əsas sual İran tərəfinin kifayət qədər çeviklik nümayiş etdirib-etdirməyəcəyi və tələb olunan addımları qəbul edib-etməyəcəyidir.
Xatırladaq ki, İran və ABŞ aprelin 11-də İslamabadda bir neçə raund danışıqlar aparıblar. Hər iki tərəf daha sonra bəyan edib ki, ciddi fikir ayrılıqları səbəbindən uzunmüddətli razılaşma əldə olunmayıb. Yeni danışıqlar raundu ilə bağlı detallar isə hələ açıqlanmayıb. ABŞ-ın İrana qarşı dəniz blokadası planları da gündəmdədir.
İzmedia.az
