İzmedia.az xəbər verir ki, “Şimal Axını” qaz kəmərlərinin partladılması ilə bağlı yeni araşdırma hadisənin detallarına aydınlıq gətirib və icraçı qrupun Polşanın Kolobjeq limanında demək olar ki, ifşa olunduğunu ortaya çıxarıb.
The Wall Street Journal jurnalisti Boyan Pancevski yazır ki, “Andromeda” adlı yaxtada olan şübhəli heyət Polşa limanına daxil olduqdan sonra öz davranışları ilə diqqət çəkib. Onların içki qəbul etməsi və musiqi səsləndirməsi liman rəhbərliyində şübhə yaradıb və polis çağırılıb.
Hadisə zamanı gəmidə olan şəxslər polislərə saxta Rumıniya və Bolqarıstan pasportları təqdim ediblər. Sənədlərin keyfiyyətinin aşağı olduğu qeyd olunsa da, sərhəd xidməti əməkdaşları gəmi üzərində ciddi yoxlama aparmadan ərazini tərk ediblər.
Araşdırmada bu hadisə ciddi suallar doğuran məqam kimi qiymətləndirilir və Polşa tərəfinin mümkün səhlənkarlığı və ya digər səbəblərlə bağlı fərziyyələr irəli sürülür.
Qeyd olunur ki, “Şimal Axını-1” və “Şimal Axını-2” qaz kəmərlərində partlayış 26 sentyabr 2022-ci ildə baş verib və Rusiya bu hadisəni beynəlxalq terror aktı kimi qiymətləndirib. Daha sonra 2025-ci ildə Ukrayna vətəndaşı Vladimir Juralyev Polşada saxlanılsa da, onun Almaniyaya ekstradisiyası rədd edilib.
Bu hadisə Avropanın enerji təhlükəsizliyi ilə bağlı ən mübahisəli araşdırmalardan biri olaraq qalır.
