İzmedia.az xəbər verir ki, Danimarkanın Baş naziri Mette Frederiksen yeni hökumət koalisiyası qurmaq cəhdində uğursuz olub. Buna səbəb əsas koalisiya tərəfdaşlarından birinin danışıqlardan geri çəkilməsi olub.
Bu hadisə mart seçkilərindən sonra Frederiksenin üçüncü dəfə ardıcıl baş nazir postunu qorumaq planını təhlükə altına salıb.
Baş nazirin rəhbərlik etdiyi mərkəz-sol koalisiya danışıqları son həftələrdə çıxılmaz vəziyyətə düşmüşdü. Bu durum ABŞ Prezidenti Donald Trump administrasiyası ilə Qrenlandiya məsələsində yaranmış böhranın həlli prosesində hökumətin qərarvermə mexanizmini də ləngidib.
İndi Danimarka kralı Frederik X hökumət qurmaq tapşırığını digər 11 partiya liderindən birinə verə bilər. Kral istəsə, sonradan Frederiksenə yenidən kabinet formalaşdırmaq şansı da tanıya bilər.
Saraydan verilən qısa açıqlamada bildirilib ki, kral bu gün Frederiksenlə görüş keçirəcək.
Mötədillər Partiyasının lideri Lars Løkke Rasmussen cümə günü Frederiksenlə aparılan danışıqları dayandırıb və hökumət qurmaq mandatının Liberal Partiyanın nümayəndəsi Troels Lund Poulsen verilməsini təklif edib. Poulsenin mərkəz-sağ hökumət qurmağa çalışacağı bildirilir.
2019-cu ildən hakimiyyətdə olan Frederiksenin Sosial Demokrat Partiyası 179 yerlik parlamentdə cəmi 38 mandat qazanıb. Bu nəticə 2022-ci ildə əldə edilən 50 mandatdan xeyli aşağıdır və partiyanın 1903-cü ildən bəri ən zəif seçki göstəricisi hesab olunur.
