Bu gün Vyanada “Eurovision” Mahnı Müsabiqəsinin ilk yarımfinalı keçirilir. Lakin tədbirə gələn azarkeşlər Viener Stadthalle stadionunda və ətraf ərazilərdə gücləndirilmiş təhlükəsizlik tədbirləri ilə qarşılaşırlar.
Şəhər meriyasının qarşısında keçirilən açılış mərasimi artıq göstərib ki, “Eurovision 2026” yüksək təhlükəsizlik rejimi altında təşkil olunur. Böyük izdiham, uzun növbələr və ciddi nəzarət bəzi ziyarətçilər arasında narahatlıq yaradıb.
Təşkilatçılar stadionun girişində hava limanlarına bənzər yoxlama sistemi tətbiq ediblər. Ziyarətçilər metal detektorlarından keçir, əlavə təhlükəsizlik yoxlamalarına cəlb olunur və polis nəzarəti altında stadiona daxil olurlar. Əraziyə çoxsaylı polis və mühafizə qüvvələri yerləşdirilib.
Artan təhlükəsizlik riskləri və ümumi siyasi vəziyyət səbəbindən təşkilatçılar tədbirin tam nəzarət altında keçirilməsinə üstünlük verirlər və azarkeşlərə daha erkən gəlmək tövsiyə olunur.
Qadağan olunan əşyaların siyahısı genişdir. Stadion ərazisinə silahlar, şüşə butulkalar, konserv qabları, pirotexnika vasitələri, lazer göstəricilər, meqafonlar və fitlər gətirmək qadağandır. Həmçinin çamadanlar, qatlanan stullar, skuterlər, skeytbordlar və digər atıla bilən əşyalar da icazəsizdir.
İçkilərlə bağlı da məhdudiyyətlər tətbiq olunub — yalnız yarım litrə qədər açıq və sınmayan qabda spirtsiz içki gətirməyə icazə verilir.
Bayraqlarla bağlı qaydalar da sərtdir. Hər tamaşaçı yalnız bir bayraq gətirə bilər, onun ölçüsü A2 formatından böyük olmamalıdır və alov gecikdirici materialdan hazırlanmalıdır. Təhqiramiz və ya diskriminativ məzmunlu simvollara isə qətiyyən icazə verilmir.
Bəzi azarkeşlər bu qədər sərt qaydaların koronavirus dövrünü xatırlatdığını desələr də, təşkilatçılar bunun məqsədinin Avropanın ən böyük televiziya şoularından birində təhlükəsizliyi maksimum təmin etmək olduğunu bildirirlər.
İzmedia.az
