ABŞ Hərbi Hava Qüvvələrinin İranla davam edən hərbi əməliyyatlar çərçivəsində ümumilikdə 42 hava vasitəsi itirdiyi bildirilir. Məlumat ABŞ Konqresinin Tədqiqat Xidmətinin hesabatına istinadən yayılıb.
Hesabatda qeyd olunur ki, itkilərin böyük hissəsi dronlar və yanacaqdaşıyan təyyarələr arasında qeydə alınıb.
Məlumata əsasən, ABŞ tərəfi MQ-9 Reaper tipli 24 pilotsuz uçuş aparatını və bir ədəd MQ-4C Triton kəşfiyyat dronunu itirib. Bundan əlavə, F-15E Strike Eagle, F-35A Lightning II və A-10 Thunderbolt II kimi döyüş təyyarələrinin də sıradan çıxdığı bildirilir.
Hesabatda həmçinin 7 ədəd KC-135 Stratotanker yanacaqdaşıyan təyyarənin zərər gördüyü və ya sıradan çıxdığı qeyd olunur. Onlardan birinin İraqda qəzaya uğradığı, digərlərinin isə bölgədəki hücumlar zamanı zədələndiyi bildirilir.
Bundan başqa, xüsusi əməliyyatlara aid MC-130J Commando II tipli iki nəqliyyat təyyarəsinin də yerə endirildikdən sonra məhv edildiyi, həmçinin bir neçə hərbi helikopter və AWACS tipli erkən xəbərdarlıq təyyarəsinin zərər gördüyü iddia olunur.
Hesabatda münaqişənin ABŞ-a maliyyə baxımından da ciddi yük yaratdığı qeyd edilir — əməliyyat xərclərinin 85 milyard dollardan çox olduğu bildirilir.
Qeyd edək ki, məlumatlar müxtəlif hərbi və analitik mənbələrə əsaslanır və rəsmi Pentaqon təsdiqi ilə bağlı əlavə açıqlama verilməyib.
