Alimlər yuxusuz gecədən sonra əlavə yuxunun orqanizmə ciddi müsbət təsir göstərdiyini və hətta uzunmüddətli sağlamlıq risklərini azalda bildiyini müəyyən ediblər.
Çinin Tsinxua Universitetinin tədqiqatçıları tərəfindən aparılan və “Nature Communications” jurnalında dərc olunan araşdırmaya əsasən, yuxu çatışmazlığını sonradan kompensasiya etmək bədəndə yaranan zərəri qismən və ya tam bərpa edə bilər.
Tədqiqat çərçivəsində Böyük Britaniya Biobankının 85 mindən çox iştirakçısının məlumatları və ümumilikdə 574 min gecəlik yuxu göstəriciləri analiz edilib. İştirakçılar bir həftə ərzində xüsusi sensorlarla yuxu rejimini izləyiblər.
Nəticələr göstərib ki, insanların orta yuxu müddəti təxminən 6,4 saat olub və iştirakçıların təxminən 30%-i mütəmadi olaraq yuxusuzluqdan əziyyət çəkib.
Araşdırmaya görə:
- Daimi yuxu çatışmazlığı olanlarda ölüm riski təxminən 15% daha yüksək olub
- Amma yuxusuz gecədən sonra əlavə 1 saat və ya daha çox yatanlarda bu risk normallaşıb
- Hətta ardıcıl iki gecə yuxusuzluqdan sonra belə “kompensasiya yuxusu” müəyyən qoruyucu təsir göstərib
Bununla belə, alimlər bildirirlər ki, bu nəticələr “yuxusuzluq zərərsizdir” demək deyil. Mütəxəssislərə görə, ideal yuxu müddəti 6–8 saat aralığında olmalıdır və davamlı yuxu çatışmazlığı orqanizmdə ciddi fəsadlar yaradır.
Tədqiqatın müəllifləri qeyd edirlər ki, kompensasiya yuxusu müəyyən hallarda faydalı olsa da, sağlam həyat tərzinin əsasını müntəzəm və keyfiyyətli yuxu təşkil edir.
