Avropa Birliyi Komissiyası ABŞ Ali Məhkəməsinin Donald Trump administrasiyasının qlobal tariflərini ləğv etməsindən sonra Vaşinqtondan ötən il əldə edilən Aİ-ABŞ ticarət razılaşmasının şərtlərinə riayət etməsini tələb edib. Brüssel ABŞ-ın qəbul etdiyi yeni vergi qərarları ilə bağlı “tam aydınlıq” istəyir.
Tramp administrasiyası əvvəlcə müvəqqəti olaraq 10% tarif elan etmiş, sonra isə bir gün ərzində bu dərəcəni 15%-ə qaldırmışdı. Bu addım Avropa tərəfdə müqavilənin gələcəyi ilə bağlı narahatlıqlar yaradıb.
Avropa Komissiyası bəyan edib ki, tərəflər arasında ötən il razılaşdırılmış “ədalətli, balanslı və qarşılıqlı faydalı” ticarət çərçivəsi bu hadisələrlə sarsılıb. Brüssel mesajında “Razılaşma razılaşmadır” ifadəsinə yer verib və Aİ məhsullarının əvvəllər müəyyən edilmiş yuxarı limitdən kənara çıxan yeni tariflərlə üzləşməməli olduğunu vurğulayıb.
Komissiya həmçinin qeyd edib ki, gözlənilməz vergi qərarları qlobal bazarlara inamı sarsıdır və ticarətə mənfi təsir göstərir.
Keçən ilin razılaşmasının əsas məqamları
Ötən il imzalanan razılaşmaya əsasən, ABŞ-ın Aİ məhsullarına tətbiq etdiyi ümumi tarif dərəcəsi 15 faiz müəyyən edilib. Polad kimi bəzi sektorlar xüsusi qaydalara tabe olsa da, təyyarələr və ehtiyat hissələri kimi məhsullara sıfır gömrük tariflərinin tətbiqi qərara alınmışdı. Eyni zamanda, Aİ bir çox ABŞ məhsullarına idxal tariflərini qaldırmaq və qisas təhdidindən imtina etmək barədə razılaşmışdı.
Avropa Komissiyasının ticarət komissarı Maros Sefcovic ABŞ Ticarət Nümayəndəsi Jameson Greer və Ticarət Katibi Howard Lutnick ilə məsələni müzakirə edib. Brüssel Vaşinqtondan atılacaq addımlar ilə bağlı aydınlıq gözləyir.
İzmedia.az
