Dawn qəzetinin məlumatına görə, Pakistanın paytaxtı İslamabad İran–ABŞ danışıqları ərəfəsində yüksək hazırlıq vəziyyətinə gətirilib.
Çoxsəviyyəli təhlükəsizlik tədbirləri çərçivəsində şəhərə 10 mindən çox təhlükəsizlik əməkdaşı cəlb olunub. Tədbirlər hərbi qüvvələr, polis və digər hərbiləşdirilmiş strukturların iştirakı ilə həyata keçirilir.
Ordu və digər təhlükəsizlik qüvvələri hökumət binaları və diplomatik nümayəndəliklərin yerləşdiyi “qırmızı zona”nın mühafizəsini təmin edəcək. Əhəmiyyətli obyektlərə qoşunlar yerləşdirilib, zonaya bütün giriş-çıxışlar bağlanacaq.
Bundan əlavə, səfər edən nümayəndə heyətlərinin hərəkəti üçün xüsusi marşrutlar müəyyən edilib. Qəzet qeyd edir ki, yüksək vəzifəli şəxslərlə birlikdə fəaliyyət göstərən mühafizə qruplarına mobil telefonlar və rəqəmsal saatlar da daxil olmaqla hər hansı cihazın gətirilməsinə icazə verilməyəcək.
İzmedia.az
