Bloomberg agentliyinin məlumatına görə, Yaxın Şərqdə davam edən hərbi əməliyyatlar neft ödənişlərində yuanın istifadəsinin kəskin artmasına səbəb olub və bu, “petroyuan” modelinin yenidən gündəmə gəlməsi ilə nəticələnib.
Agentlik bildirir ki, İran Hörmüz boğazından gəmilərin tranziti üçün ödəniş kimi yuan qəbul etməyə başlayıb. Eyni zamanda, Çinin Sərhədlərarası Banklararası Ödəniş Sistemi (CIPS) son günlərdə rekord əməliyyat həcmi qeydə alıb və bir gündə ilk dəfə 1 trilyon yuan həddini keçib.
Bloomberg-in məlumatına görə, Çin rəsmiləri Yaxın Şərqdəki neft ixrac edən ölkələrlə iqtisadi əlaqələrin gücləndirilməsi istiqamətində aktiv siyasət aparırlar. Bu çərçivədə CIPS-in əhatə dairəsinin genişləndirilməsi, Şanxayda neft ticarəti infrastrukturunun inkişafı və beynəlxalq rəqəmsal valyuta platformasının yaradılması imkanları nəzərdən keçirilir.
Agentliklə danışan analitiklər hesab edirlər ki, ABŞ və İsrailin İrana qarşı münaqişəsi, eləcə də Vaşinqton və onun ənənəvi müttəfiqləri arasındakı gərginlik dolların qlobal cazibəsini zəiflədə bilər və alternativ valyutalara marağı artıra bilər.
İzmedia.az
