ABŞ texnologiya nəhəngi Apple-ın baş icraçı direktoru Tim Kuk 2026-cı ilin payızında vəzifəsindən istefa verəcək və onun yerinə aparat mühəndisliyi üzrə rəhbər Con Ternus təyin olunacaq.
İzmedia.az xəbər verir ki, bu barədə şirkət açıqlama yayıb.
Şirkətin rəsmi saytında dərc edilən məlumatda bildirilir:
“Apple, Tim Kukun şirkətin direktorlar şurasının icraçı sədri olacağını və aparat mühəndisliyi üzrə baş vitse-prezident Con Ternusun 1 sentyabr 2026-cı ildən etibarən Apple-ın növbəti baş icraçı direktoru olacağını açıqladı. Direktorlar şurası tərəfindən yekdilliklə təsdiqlənən bu keçid düşünülmüş, uzunmüddətli varislik planlaşdırması prosesindən sonra baş verir”.
Tim Kuk 1998-ci ildə Apple-a qoşulub, 2011-ci ildə isə baş direktor vəzifəsinə təyin olunub. Onun rəhbərliyi dövründə Apple-ın bazar kapitallaşması 350 milyard dollardan 4 trilyon dollara yüksəlib, illik gəliri isə təxminən dörd dəfə artıb.
Yeni baş direktor olacaq Con Ternus 2001-ci ildən Apple-da çalışır və 2013-cü ildən aparat mühəndisliyi üzrə vitse-prezident vəzifəsini tutur. O, iPad və AirPods daxil olmaqla bir sıra əsas məhsul xətlərinin, eləcə də iPhone, Mac və Apple Watch-un bir neçə nəslinin hazırlanması və bazara çıxarılmasında mühüm rol oynayıb. Apple-a qoşulmazdan əvvəl Ternus Pensilvaniya Universitetində mexaniki mühəndislik üzrə təhsil alıb və Virtual Research Systems şirkətində mühəndis kimi çalışıb.
İzmedia.az
