ABŞ-nin vitse-prezidenti JD Vens Tramp administrasiyasının Ukraynaya birbaşa silah göndərilməsini dayandırmaq qərarını açıq şəkildə dəstəkləyib. O, Turning Point tədbirində bildirib ki, “ən çox qürur duyduğum şeylərdən biri budur… biz Avropaya dedik ki, əgər silah almaq istəyirsə, ala bilər, amma ABŞ artıq silah alıb Ukraynaya göndərmir”.
“Kyiv Independent” yazır ki, bu mövqe ABŞ Konqresində tənqidlərə səbəb olub. Nümayəndələr Palatasının üzvü Marcy Kaptur belə siyasətin yalnız Rusiyanın xeyrinə işlədiyini bildirib.
Məlumata görə, Vens yalnız administrasiyanın mövqeyini müdafiə etmir, həm də xarici siyasət müzakirələrinə təsir göstərən əsas fiqurlardan biri kimi çıxış edir. Ağ Ev daxilində onun Ukrayna siyasətinin formalaşmasında aktiv rol aldığı bildirilir.
Ukrayna ilə bağlı əvvəlki mövqeyi
Vensin Ukraynaya skeptik yanaşması yeni deyil. O, 2022-ci ildə senator namizədi olarkən “Ukraynaya nə baş verəcəyi mənim üçün əhəmiyyətli deyil” kimi açıqlaması ilə tənqid olunmuşdu. O dövrdə o, ABŞ-ın Ukraynaya dəstəyini milli maraqlara uyğun saymadığını bildirirdi.
Daxili fikir ayrılıqları
Məlumata görə, Vensin yaxın çevrəsində və bəzi dövlət rəsmiləri arasında fərqli yanaşmalar mövcuddur. ABŞ ordusunun katibi Daniel Driscoll kimi bəzi rəsmilər Ukraynaya açıq dəstək verən mövqe tuturlar və ABŞ-ın Ukrayna müharibəsindən “çox şey öyrəndiyini” bildirirlər.
Analitiklərin qiymətləndirməsi
Analitiklər hesab edirlər ki, Vensin mövqeyi klassik təcridçilikdən çox ABŞ-ın xarici siyasətini seçici şəkildə aparmaq yanaşmasına əsaslanır. Onun həm İsrail, həm də Tayvana dəstəyi bu xəttin tam izolasionist olmadığını göstərir.
Ekspertlər həmçinin bildirirlər ki, Vensin Ukrayna ilə bağlı ritorikası ABŞ daxilində siyasi baza ilə əlaqəni gücləndirmək və administrasiya daxilində təsirini artırmaq məqsədi daşıya bilər.
İzmedia.az
