Yaponiya hakimiyyəti Tehrana “İdemitsu Maru” tankerinin Hörmüz boğazından keçməsi üçün heç bir ödəniş etməyib. Bu barədə Yaponiyanın “Nikkei” biznes qəzeti məlumat yayıb.
Nəşrin Yaponiya hökumətindəki mənbələrinə görə, gəminin boğazdan keçidi hökumət orqanları ilə İran tərəfi arasında aparılan danışıqlar nəticəsində mümkün olub. Yüksək vəzifəli bir hökumət rəsmisi bildirib: “Bu, Yaponiya hökuməti tərəfindən aparılan danışıqların nəticəsidir. Biz tankerin keçidi üçün heç bir rüsum ödəməmişik”.
Xatırladılır ki, daha əvvəl “Tasnim” agentliyi Yaponiyanın “İdemitsu Maru” tankerinin İranın vasitəçiliyi ilə Hörmüz boğazından keçdiyini bildirmişdi. Məlumata əsasən, göyərtəsində iki milyon barel neft olan və “İdemitsu Kosan” şirkətinə məxsus tanker fevral ayının sonundan etibarən Səudiyyə Ərəbistanı sahillərində idi.
Bundan əvvəl ABŞ və İsrailin 28 fevralda İrana qarşı hərbi əməliyyata başladığı, Tehran və digər iri şəhərlərin zərbələrə məruz qaldığı bildirilir. İran İslam İnqilabı Keşikçiləri Korpusu İsraildəki obyektlərə qarşı cavab əməliyyatı elan edib. Bəhreyn, İordaniya, Küveyt, Qətər, Səudiyyə Ərəbistanı və BƏƏ-də yerləşən ABŞ hərbi bazalarının da hədəfə alındığı qeyd olunur.
Məlumata görə, Ali Rəhbər Ayətullah Əli Xamenei və digər bəzi İran rəsmiləri ABŞ–İsrail birgə hücumları zamanı həlak olub. İran hakimiyyəti həmçinin Hörmüz boğazını ABŞ, İsrail və İrana qarşı təcavüzü dəstəkləyən ölkələrlə əlaqəli gəmilər üçün bağlamaq qərarı verib. Münaqişə dövründə bir neçə tankerə boğazdan icazəsiz keçdiyinə görə hücum edildiyi bildirilir.
25 mart tarixində İranın xarici işlər naziri Abbas Əraqçi isə ölkəsinin Rusiya, Hindistan, İraq, Çin və Pakistan daxil olmaqla dost ölkələrin Hörmüz boğazından keçidinə icazə verdiyini açıqlayıb.
İzmedia.az
