Alimin qohumları, dostları və həmkarları tərəfindən onunla bağlı yenilikləri paylaşmaq və müdafiəsi üçün vəsait toplamaq məqsədilə yaradılan “Advocate for Alexander Butyagin” Telegram kanalının məlumatına görə, rusiyalı arxeoloq Aleksandr Butyagin doğma şəhəri Sankt-Peterburqa qayıdıb.
Kanalda “Aleksandr Butyagin Sankt-Peterburqda evindədir” məlumatı paylaşılıb.
Butyagin daha əvvəl “İzvestiya” nəşrinə verdiyi açıqlamada bildirib ki, Sankt-Peterburqa gəldikdən sonra ilk olaraq Ermitaj Muzeyini ziyarət etməyi planlaşdırır.
Dekabrın 4-də Polşa təhlükəsizlik xidmətləri Butyagini mühazirə turu çərçivəsində Hollandiyadan Balkanlara gedərkən saxlayıb. Varşava məhkəməsi onun həbsinə qərar verib və həbs müddətini 1 iyuna qədər uzadıb.
Polşa prokurorluğu Ukraynadan ekstradisiya tələbi aldığını bildirərək, onun 10 ilə qədər həbs cəzası ilə üzləşə biləcəyini iddia edib. Varşava məhkəməsi ekstradisiya ilə bağlı qərar çıxarıb və müdafiə tərəfi bu qərardan apelyasiya şikayəti verməyi planlaşdırıb.
Butyagin Belarus–Polşa sərhədində baş tutan mübadilə çərçivəsində azad edilib. Bildirilir ki, arxeoloqun geri qaytarılması Belarus təhlükəsizlik xidmətləri ilə əməkdaşlıq nəticəsində həyata keçirilən çoxmərhələli əməliyyatın nəticəsi olub.
BelTA xəbər agentliyinin məlumatına görə, mübadilə Rusiya, Belarus və digər Müstəqil Dövlətlər Birliyi ölkələrinin vətəndaşlarının iştirakı ilə “beşin beşə” prinsipi əsasında həyata keçirilib.
İzmedia.az
