İzmedia.az xəbər verir ki, ABŞ Müdafiə Nazirliyi UFO-larla bağlı yeni sənədlərin yayımlanmasına başlayıb və ictimaiyyətin “naməlum anomal fenomenlər” barədə öz nəticəsini çıxara biləcəyini bildirib.
Pentaqon cümə günü X sosial şəbəkəsində etdiyi paylaşımda əvvəlki administrasiyaların Amerika ictimaiyyətini bu mövzudan uzaq tutmağa çalışdığını qeyd edib. Bildirilib ki, ABŞ Prezidenti Donald Trump bu sənədlərdə yer alan məlumatlarla bağlı maksimum şəffaflığın təmin olunmasına önəm verir. Nazirlik əlavə sənədlərin mərhələli şəkildə yayımlanacağını açıqlayıb.
Qeyd olunub ki, Tramp fevral ayından etibarən bu addımın siqnallarını verirdi. O, daha əvvəl John F. Kennedy, Robert F. Kennedy və Martin Luther King Jr. sui-qəsdlərinə dair sənədləri də ictimaiyyətə açıqlamışdı.
Pentaqon uzun illərdir UFO sənədlərinin məxfiliyinin aradan qaldırılması istiqamətində çalışır. ABŞ Konqresi 2022-ci ildə bu materialların yayımlanması üçün xüsusi ofis yaratmışdı. Həmin ofisin 2024-cü ildə dərc etdiyi ilk hesabatda yüzlərlə yeni UAP hadisəsi qeydə alınsa da, ABŞ hökumətinin yadplanetli texnologiyasını təsdiqlədiyinə dair heç bir sübut tapılmayıb.
Məlumata görə, Konqres orduda çalışan bəzi şəxslərin açıqlanmayan hava obyektləri ilə qarşılaşmaları barədə məlumat paylaşmasından sonra Pentaqona onilliklərə aid UFO müşahidə sənədlərini yayımlamaq göstərişi vermişdi.
Yayımlanan infraqırmızı görüntülərdən birində 2025-ci ilin sentyabrında ABŞ-ın qərbi üzərində uçduğu iddia edilən naməlum qara obyekt əks olunub.
Konqresdəki bəzi respublikaçılar isə Pentaqonu sənədləri gizlətməkdə ittiham edərək daha çox şəffaflıq tələb edirlər. Nümayəndə Anna Paulina Luna mart ayında göndərdiyi məktubda 46 UAP videosunun yayımlanmasını istəyib. O bildirib ki, həmin videoların gələcək mərhələdə ictimaiyyətə təqdim olunması gözlənilir.
Nümayəndə Tim Burchett isə Trampa “şəffaflıq və açıqlıq” vədinə əməl etdiyi üçün təşəkkür edib.
Ekspertlər isə yeni sənədlərin yayımlanmasına ehtiyatla yanaşmağın vacibliyini bildirirlər. Onların fikrincə, UAP videoları inkişaf etmiş hərbi texnologiyalara bələd olmayan şəxslər tərəfindən tez-tez yanlış şərh olunur. Pentaqonun 2024-cü il hesabatı da ABŞ hökumətinin yadplanetli texnologiya əldə etdiyi və ya yadplanetli həyatın mövcudluğunu təsdiqlədiyi barədə iddiaları təkzib edib.
