İzmedia.az xəbər verir ki, Çikaqoda bir bankın müştəri xidmətləri əməkdaşı Papa XIV Leonun telefon vasitəsilə əlaqə məlumatlarını dəyişmək istəyini qəbul etməyib. Bank profilində dəyişiklik yalnız rəhbərliklə əlaqəsi olan şəxslərin müdaxiləsindən və hesabın başqa banka köçürülə biləcəyi xəbərdarlığından sonra mümkün olub.
Pontifikin yaxın dostu ata Tom Makkartinin sözlərinə görə, hadisə XIV Leonun pontifikatının başlamasından təxminən iki ay sonra baş verib. Dünyəvi adı Robert Frensis Prevost olan Roma Papası Cənubi Çikaqodakı banka zəng edərək hesabında qeyd olunan telefon nömrəsini və ünvanı dəyişmək istəyib. O, operatorun verdiyi bütün təhlükəsizlik suallarını düzgün cavablandıraraq yoxlamadan keçib.
Müştərinin kimliyi təsdiqləndikdən sonra əməkdaş bildirib ki, təqdim olunan məlumat kifayət deyil və dəyişiklik üçün bank filialına şəxsən gəlmək lazımdır. Papa şəxsən gələ bilməyəcəyini bildirsə də, operator standart prosedurun dəyişməyəcəyini vurğulayıb.
Məlumata görə, Roma Papası XIV Leo 8 may 2025-ci ildən Roma-Katolik Kilsəsinə və Vatikan dövlətinə rəhbərlik edir.
