izmedia.az xəbər verir ki, Böyük Britaniya şirkətləri Yaxın Şərqdə gərginliyin artması və Hörmüz boğazı ətrafında vəziyyətin pisləşməsi fonunda kütləvi şəkildə daimi işçilər əvəzinə müvəqqəti işçi qəbuluna keçməyə başlayıb. Bu səbəbdən daimi məşğulluq azalır, işəgötürənlər isə riskləri minimuma endirmək üçün çevik müqavilələrə üstünlük verirlər.
Məlumata görə, ölkə yeni iqtisadi reallıqla üz-üzə qalıb. İşə qəbul və məşğulluq üzrə Konfederasiyanın məlumatlarına əsasən, şirkətlər artıq daha çox daimi işçi götürməkdən imtina edərək müvəqqəti işçilərə üstünlük verirlər.
Bunun əsas səbəbi qlobal bazarlarda artan qeyri-sabitlikdir. Hörmüz boğazının faktiki olaraq bağlanması nəticəsində neft və mayeləşdirilmiş təbii qaz (LNG) tədarükü çətinləşib.
Bu boğaz vasitəsilə Fars körfəzindən gələn enerji daşıyıcılarının böyük hissəsi dünya bazarlarına çıxır. Onun bağlanması Avropada, o cümlədən Britaniyada yanacaq və sənaye məhsullarının qiymətlərinin kəskin artmasına səbəb olub.
Rəqəmlərə görə, apreldə daimi iş yerlərinə qəbul son üç ayın ən sürətli enişini göstərib və 2022-ci ildən başlayan azalma tendensiyası davam edir. Ekspertlər bildirirlər ki, şirkətlər artan xərclər və zəif istehlak tələbi ilə üzləşiblər.
Eyni zamanda, qısamüddətli müqavilələr üzrə iş yerlərinin sayı yanvar ayından bəri ilk dəfə artaraq son iki ilin ən yüksək səviyyəsinə çatıb. KPMG-nin Böyük Britaniya üzrə rəhbəri Con Holtun fikrincə, bu çeviklik şirkətlərə ciddi tənəzzüldən yayınmağa imkan verir və iqtisadi çətinliklərə baxmayaraq inkişaf potensialını qoruyur.
Böyük Britaniyanın Mərkəzi Bankı üçün vəziyyət çətin seçim yaradır: tənzimləyici qurum zəif istehlak tələbi ilə enerji qiymətlərinin yaratdığı inflyasiya təzyiqi arasında balans tapmağa çalışır. Hazırkı məlumatlara görə, Yaxın Şərq böhranı əməkhaqqı artımını hələ ki sürətləndirməyib. Lakin ekspertlər xəbərdarlıq edirlər ki, enerji qiymətlərinin yüksəlməsi gələn il əməkhaqqı danışıqlarında əsas mövzuya çevrilə bilər və bu da daimi iş bazarına əlavə təzyiq göstərə bilər.
