izmedia.az xəbər verir ki, Fransanın Ermənistana həyata keçirdiyi uçuşlar beynəlxalq ictimaiyyətdə müzakirələrə səbəb olub. Uçuş izləmə məlumatlarında görünən hərəkətlilik Fransa hərbi təyyarələrinin daşıdığı yükün mahiyyəti ilə bağlı suallar yaradıb.
Azərbaycan mediasında yer alan xəbərlərdə Fransanın Ermənistana yönəlmiş uçuşlarının diqqətlə araşdırıldığı bildirilib. Fransız mediasının təqdim etdiyi rəsmi açıqlamalarla uçuş məlumatları arasında bəzi ziddiyyətlərin olduğu iddia edilir.
Məlumata görə, Fransa prezidenti Emmanuel Makronun 5 may tarixində İrəvana səfərindən əvvəl, 4 mayda Fransa Hava və Kosmik Qüvvələrinə məxsus Airbus A330-200 tipli hərbi nəqliyyat təyyarəsi İrəvana eniş edib. Təyyarənin ertəsi gün Parisə, daha sonra isə Fransadakı hərbi bazaya qayıtdığı qeyd olunub.
Uçuşun rəsmi səfər çərçivəsində logistik məqsədlə həyata keçirildiyi ehtimal edilsə də, daşınan yük barədə dəqiq məlumat verilməməsi diqqət çəkib. Bu isə uçuşun daha genişmiqyaslı hərbi dəstək əməliyyatının bir hissəsi olub-olmaması ilə bağlı sualları artırıb.
Xəbərdə Fransa ordusuna məxsus A400M hərbi nəqliyyat təyyarəsinin 11 may tarixində Cənubi Qafqaz istiqamətində həyata keçirdiyi uçuşa da diqqət çəkilib. İddialara görə, təyyarənin yükü Gürcüstan üçün qaz balonları, litium batareyalar və müxtəlif kimyəvi maddələr kimi göstərilib. Lakin bu məlumatların doğruluğunu təsdiqləyən rəsmi sübutun olmadığı vurğulanıb.
Bəzi ekspertlər isə təyyarələrin “Caesar” haubitsaları və digər hərbi texnika daşıdığı ehtimalını irəli sürüb. Xüsusilə, 28 mayda Ermənistanda keçiriləcək hərbi parad görüntülərində Fransada istehsal olunan “Caesar” haubitsalarının görünməsi bu iddiaları gücləndirib.
Mütəxəssislər bildirirlər ki, əgər bu iddialar doğru olarsa, bu vəziyyət 1944-cü il Çikaqo Konvensiyasının mülki və hərbi uçuşlarla bağlı qaydalarının pozulması kimi qiymətləndirilə bilər.
Hələlik Paris və ya İrəvan rəsmiləri məsələ ilə bağlı rəsmi açıqlama verməyiblər. Bununla belə, uçuşlarla bağlı ortaya çıxan məlumatlar Fransanın Ermənistana hərbi dəstəyi ilə bağlı müzakirələri yenidən gündəmə gətirib.
Qeyd edək ki, son illərdə Fransanın Ermənistana hava müdafiə sistemləri, zirehli texnika və müxtəlif sursatlar daxil olmaqla hərbi dəstəyini artırdığı bildirilir.
