izmedia.az xəbər verir ki, Yaponiya və Cənubi Koreya xam neft tədarükünün təmin edilməsi üçün yeni əməkdaşlıq çərçivəsi üzrə razılığa gəlməyə hazırlaşır.
Məlumata görə, Yaponiyanın Baş naziri Sanae Takaichi və Cənubi Koreya Prezidenti Li Jae Myung arasında keçiriləcək görüşdə birgə neft ehtiyatlarının yaradılması və enerji təhlükəsizliyi sahəsində koordinasiya məsələləri müzakirə olunacaq.
Nikkei biznes qəzetinin yazdığına görə, tərəflər bu əməkdaşlıq çərçivəsinə maliyyə və texniki dəstək mexanizmlərini də daxil etməyi planlaşdırır.
Görüşün Cənubi Koreyanın Andonq şəhərində keçiriləcəyi və bu sammitin yanvar ayından sonra iki ölkə liderləri arasında ilk görüş olacağı bildirilir.
Yaponiya tərəfi isə sammit öncəsi enerji sahəsində konkret əməkdaşlıq danışıqlarının aparılacağını açıqlayıb.
Məlumata əsasən, layihə Cənub-Şərqi Asiya ilə mövcud enerji əməkdaşlığı çərçivəsindən də istifadə etməklə həyata keçiriləcək.
Bundan əlavə, tərəflərin ABŞ Prezidenti Donald Tramp və Çin lideri Si Cinpin arasında Pekində keçirilən son görüşlə bağlı da məlumat mübadiləsi aparacağı qeyd olunur.
