“The Guardian” qəzetinin məlumatına görə, Fransa uşaq istismarı ilə bağlı genişmiqyaslı qalmaqalla üzləşib. Məlumata əsasən, onlarla dövlət uşaq bağçası və ibtidai məktəbdə çalışan işçilər zorakılıq, cinsi təcavüz və digər ağır hüquq pozuntularında şübhəli bilinirlər.
Prokurorluğun bildirdiyinə görə, Paris polisi nahar fasilələri, yuxu saatları və dərsdən sonrakı fəaliyyətlər zamanı uşaqlara nəzarət edən məktəb işçiləri tərəfindən üç yaşından kiçik uşaqlara qarşı 100-dən çox fiziki zorakılıq və cinsi istismar iddiasını araşdırır.
Paris Baş Prokuroru Lore Bekko bildirib: “Biz 84 uşaq bağçasında, təxminən 20 ibtidai məktəbdə və 10-a yaxın məktəbdənkənar qayğı mərkəzində araşdırmalar aparırıq”. Vəkillərin sözlərinə görə, araşdırılan hallar arasında üç və dörd yaşlı uşaqlarla bağlı cinsi zorakılıq iddiaları da var.
Valideyn təşkilatları illərdir bu tip iddiaların ciddi araşdırılmasına çalışdıqlarını bildirir və işçi seçimindəki problemlərin, eləcə də yoxlama mexanizmlərindəki çatışmazlıqların bu halların davam etməsinə şərait yaratdığını qeyd edirlər.
Paris Şəhər Bələdiyyəsi yaxınlığında keçirilən mətbuat konfransında çıxış edən #MeTooEcole hərəkatının həmtəsisçisi Barka Zerouali bildirib: “Bu, genişmiqyaslı bir qalmaqaldır”.
Məlumata görə, məktəb “nəzarətçiləri” nahar, fasilə, yuxu və dərsdən sonrakı fəaliyyətlər zamanı uşaqlara cavabdeh olan işçilərdir. Onlar bəzi hallarda uşaqlarla müəllimlərdən daha çox vaxt keçirirlər. Bu şəxslər məktəblərin və ya Təhsil Nazirliyinin daimi əməkdaşları deyil, əsasən yerli idarəetmə qurumları tərəfindən işə götürülürlər və bir çox hallarda xüsusi təhsil və ya peşə hazırlığına malik olmurlar.
Fransada üç yaşından etibarən məktəbəqədər təhsil məcburi hesab edilir və bu işçilər gündəlik olaraq 3–11 yaşlı uşaqlarla ünsiyyətdə olurlar.
Ölkənin müxtəlif bölgələrindən daxil olan məlumatlarda uşaqlara qışqırmaq, onları itələmək, saçlarını dartmaq, yeməkdən məhrum etmək, qusana qədər yeməyə məcbur etmək, həmçinin cinsi zorakılıq hallarının yer aldığı bildirilir.
Parisdə iki ailəni təmsil edən vəkil Lois Caye bildirib ki, 2025-ci ilin fevral ayında uşaq bağçalarında baş verən hadisələrlə bağlı polisə müraciətlər daxil olub. İddialardan birində üç yaşlı qızın Parisin qərbində yerləşən məktəblərdən birində işçi tərəfindən cinsi zorakılığa məruz qaldığı qeyd edilir. Digər hadisədə isə üç yaşlı oğlanın əvvəllər də zorakılıq şikayətləri səbəbindən başqa müəssisəyə köçürülmüş həmin işçi tərəfindən zərər gördüyü iddia olunur.
Paris meri Emmanuel Qrequar məktəb köməkçiləri sistemindəki “ciddi sistem problemlərinin” aradan qaldırılması məqsədilə 20 milyon avroluq proqramın başladıldığını açıqlayıb.
Vəkil Caye bildirib ki, uşaqlar bu hadisələrin nəticəsində həm fiziki, həm də psixoloji zərər görürlər. Onun sözlərinə görə, baş verənlərin real miqyasını müəyyənləşdirməyə çalışan valideynlər üçün bu proses gündəlik ağır psixoloji yükə çevrilib.
Hazırda Parisdə üç yaşdan beş yaşadək beş uşağa qarşı cinsi istismarda ittiham olunan məktəb işçisinin məhkəməsinin başlanması gözlənilir. Bundan əlavə, doqquz azyaşlı qıza qarşı cinsi zorakılıqda ittiham olunan 47 yaşlı şəxslə bağlı iş üzrə hökmün gələn ay açıqlanacağı bildirilir.
Qurban ifadələri ilə işləyən SOS Périscolaire valideynlər assosiasiyası isə qalmaqalın təkcə Parislə məhdudlaşmadığını və ölkə miqyasında yayıldığını bəyan edib.
İzmedia.az
