“Top Gun: Maverick” və Jumanji filmlərindəki rolları ilə tanınan aktyor Ceyms Hendi 81 yaşında vəfat edib. “Page Six” nəşrinin məlumatına görə, aktyor çərşənbə günü Los-Ancelesdə bıçaqlı hücum nəticəsində öldürülüb.
Cinayətin təfərrüatları
Məlumata görə, çərşənbə günü səhər saatlarında Los-Ancelesin Tarzana məhəlləsindən polisə zəng daxil olub. Zəng edən şəxs “Mən indicə bir adamı öldürdüm” deyərək hadisə barədə məlumat verib.
Polis əməkdaşları hadisə yerinə çatdıqda aktyoru evin həyətində huşsuz vəziyyətdə, sinə nahiyəsindən çoxsaylı bıçaq xəsarətləri almış halda aşkar ediblər.
Hendi təcili olaraq xəstəxanaya çatdırılsa da, onun həyatını xilas etmək mümkün olmayıb.
Şübhəli polisə təslim olub
Hadisədən qısa müddət sonra 44 yaşlı Maykl Qledhil polisi saxlayaraq axtarılan şəxsin özü olduğunu bildirib.
Məlumata görə, Qledhil aktyorun sevgilisinin oğludur və hadisə baş verən zaman anası ilə birlikdə yaşayırmış. O, qətldə şübhəli bilinərək saxlanılıb. Məhkəmə onun üçün 2 milyon dollar məbləğində girov müəyyən edib.
Hücumun motivi hələlik açıqlanmayıb.
Karyerası ərzində 150-yə yaxın rolda çəkilib
Ceyms Hendi aktyorluq fəaliyyətinə 1977-ci ildə başlayıb. O, karyerası ərzində təxminən 150 film və serialda rol alıb.
Aktyor daha çox 1995-ci ildə ekranlara çıxan Jumanji filmindəki zərərvericilərlə mübarizə aparan obrazı ilə tanınıb. Onun son böyük ekran işi isə 2022-ci ildə nümayiş olunan Top Gun: Maverick filmində canlandırdığı barmen Cimmi obrazı olub.
Hendi həmçinin Taps, Araxnofobiya və Logan filmlərində də rol alıb.
İzmedia.az
