Rusiya və Cənub-Şərqi Asiya Dövlətləri Assosiasiyası (ASEAN) ərzaq və enerji təhlükəsizliyinin təmin edilməsində əməkdaşlıq üçün çox yaxşı perspektivlər görürlər. Bu barədə Rusiyanın xarici işlər naziri Sergey Lavrov Manilada keçirilən Rusiya-ASEAN xarici işlər nazirlərinin görüşündə çıxış edərkən bildirib.
Lavrov qeyd edib ki, “Ölkələrimizin liderləri siyasət və təhlükəsizlik, yeni təhdid və çağırışlarla mübarizə, ticarət, iqtisadi, investisiya, mədəni, təhsil və humanitar əlaqələrin inkişafı sahələrində mühüm razılaşmalar əldə ediblər. Ərzaq və enerji təhlükəsizliyinin təmin edilməsi, rəqəmsal transformasiya və platforma iqtisadiyyatı sahələrində çox yaxşı perspektivlər görürük. Kazanda keçirilən sammitdə qəbul edilən dörd fundamental sənəd yuxarıda qeyd olunan bütün sahələrdə birgə iş üçün aydın qaydalar müəyyən edib”.
Nazir əlavə edib ki, Kazan sammiti ASEAN ölkələrində yüksək qiymətləndirilib. “Dünən axşam gözəl bir qəbulda və bu səhər görüş başlamazdan əvvəl keçirdiyimiz ünsiyyət zamanı ASEAN-dan olan bir çox həmkarımız və dostlarımız bir aydan bir az əvvəl Kazanda keçirilən sammiti xatırlayaraq, Rusiya və ASEAN-ın bərabərlik, qarşılıqlı hörmət və qarşılıqlı fayda prinsiplərinə əsaslanan daha da yaxınlaşma və çoxşaxəli əməkdaşlığın gücləndirilməsi üçün qarşılıqlı istəyini əyani şəkildə nümayiş etdirən həmin sammitə ən yüksək hörmətlə yanaşdıqlarını bildiriblər”, – deyə o bildirib.
Lavrov iyulun 21-də Filippin paytaxtına gəlib. Nazirin 23 iyula qədər sıx bir qrafiki var. Bura ikitərəfli təmaslarla yanaşı, Rusiya-ASEAN formatında ASEAN xarici işlər nazirlərinin görüşündə, Şərqi Asiya Zirvə görüşündə və ASEAN Təhlükəsizlik üzrə Regional Forumunda iştirak daxildir.
ASEAN 1967-ci ildə yaradılıb. Təşkilata 11 ölkə daxildir: Bruney, Şərqi Timor, Vyetnam, İndoneziya, Kamboca, Laos, Malayziya, Myanma, Sinqapur, Tayland və Filippin.
İzmedia.az
