Həkim bildirib ki, böyüklər üçün şəkərin təhlükəsiz gündəlik norması təxminən 3–4 çay qaşığıdır. Lakin problem ondadır ki, bu maddə bir çox gündəlik qidaların tərkibində gizli şəkildə mövcuddur və buna görə də real qəbul edilən miqdar çox vaxt normanı xeyli aşır.
Ekaterina Kim — Uzaq Şərq Federal Universitetinin farmasiya və farmakologiya departamentinin dosenti, sağlam qidalanma üzrə mütəxəssis — bildirib ki, şəkərin təhlükəsiz miqdarı gündəlik kalori qəbulunun 5%-dən çox olmamalıdır. Bu isə təxminən 5–15 qram və ya 3–4 çay qaşığına bərabərdir.
Mütəxəssis qeyd edib ki, bu göstəriciyə yalnız ayrıca əlavə edilən şəkər yox, həm də qidaların tərkibində gizli şəkildə olan şəkər də daxildir. Onun sözlərinə görə, şəkər hətta çörək, souslar, şirələr və hazır yeməklərdə belə olur.
Həkim vurğulayıb ki, bir çox insan fərqinə varmadan gündəlik normadan dəfələrlə çox şəkər qəbul edir. Bunun əsas səbəbi isə şəkərin gündəlik məhsulların tərkibində “gizli” şəkildə olmasıdır.
O həmçinin bildirib ki, insan orqanizmi əlavə şəkərsiz də normal fəaliyyət göstərə bilər. Alternativ olaraq meyvələr və tünd şokolad daha sağlam seçim hesab olunur.
Mütəxəssisin fikrincə, ən ideal variant ümumiyyətlə əlavə şəkərin qidadan çıxarılmasıdır. Bu, həm normaya riayət etməyə, həm də ümumi sağlamlığın yaxşılaşmasına kömək edə bilər.
