Suriya Xarici İşlər Naziri Əsəd Həsən əl-Şeybaninin rəhbərlik etdiyi, Baş Kəşfiyyat İdarəsi və Hərbi Kəşfiyyat rəhbərlərinin də daxil olduğu yüksək səviyyəli Suriya nümayəndə heyəti İordaniyada ABŞ-ın vasitəçiliyi ilə İsrail rəsmiləri ilə görüşüb. SANA agentliyinin diplomatik mənbələrə istinadən verdiyi məlumata görə, Danışıqlar İsrailin Suriya ərazisinə endirdiyi son hava zərbələri və ölkənin cənubunda artan gərginlik fonunda təşkil olunub.
Görüşün əsas məqsədi İsrail hücumlarına, həbslərə və hədəfli əməliyyatlara son qoyacaq praktiki mexanizmlərin yaradılması, həmçinin gələcəkdə daha əhatəli sazişə zəmin yarada biləcək təhlükəsizlik müqaviləsi üzrə danışıqların bərpası olub.
Dəməşqin Qırmızı Xətləri və Əsas Tələbləri
Suriya heyəti görüş zamanı özünün suveren hüquqlarını qətiyyətlə müdafiə edərək aşağıdakı prioritetləri diqqətə çatdırıb:
-
Milli Suverenlik və Ordu: Suriya öz ordusunu yenidən qurmaq və milli maraqlarına uyğun olaraq xarici müttəfiqlərini seçmək hüququna malik suveren dövlətdir. Bu hüquqları məhdudlaşdıracaq hər hansı mexanizm rədd edilir.
-
Qolan Təpələri və Qoşunların Çəkilməsi: Qolan təpələrinin Suriya ərazisi olduğu bir daha vurğulanıb. Hazırkı mərhələdə əsas prioritet İsrail qoşunlarının 8 dekabr 2024-cü il tarixinədək olan mövqelərə geri çəkilməsi və 1974-cü il Sərhəd Sazişinin bərpa olunaraq tam tətbiq edilməsidir.
Türkiyə-İsrail Gərginliyinin Regiona Təsiri
Müzakirələrdə regional təhlükəsizlik kontekstində Türkiyə və İsrail arasında mövcud olan fikir ayrılıqlarının aradan qaldırılması məsələsi də yer alıb. Tərəflər iki ölkə arasındakı gərginliyin Suriya ərazisinə keçməsinin qarşısını almaq üçün addımların atılmasının vacibliyini qeyd ediblər.
İzmedia.az
