Rusiya Xarici İşlər Nazirliyinin sözçüsü Mariya Zaxarova keçirdiyi həftəlik brifinqdə Ukraynada davamlı sülh və nizamlama səylərinə mane olan hər hansı xarici hərbi kontingentin yerləşdirilməsinin Rusiya Silahlı Qüvvələri üçün qanuni hərbi hədəfə çevriləcəyini bəyan edib.
Zaxarova vurğulayıb ki, Moskva bu addımı bilavasitə xarici hərbi müdaxilə kimi qiymətləndirəcək:
“Dəfələrlə vurğuladığımız kimi, xüsusi hərbi əməliyyata və davamlı nizamlanmaya mane olan hər hansı xarici hərbi kontingentin Ukraynada yerləşdirilməsi qəti şəkildə qəbuledilməzdir və qanuni hərbi hədəflərə çevriləcək. Bunun bütün cavabdehliyi və məsuliyyəti münaqişənin daha da gərginləşməsi yolunu seçən Qərb siyasətçilərinin üzərinə düşür.”
Diplomat həmçinin “Könüllülər Koalisiyası”nın (Coalition of the Willing) oktyabr-noyabr aylarında Ukrayna ilə həmsərhəd olan Avropa İttifaqı ölkələrində keçirməyi planlaşdırdığı hərbi təlimlərə toxunub. Zaxarovanın sözlərinə görə, bu manevrlər əslində Avropa NATO üzvü olan dövlətlərin münaqişəyə daha dərin cəlb olunması istiqamətində atılan növbəti təhlükəli adımdır.
Rusiya XİN rəsmisi əlavə edib ki, Qərb ölkələri bir tərəfdən danışıqlar masasında yer tələb edərək sülh tərəfdarı kimi görünməyə çalışır, digər tərəfdən isə regionda hərbi mövcudluğunu artırmaqla gərginliyi körükləyir.
İzmedia.az
