ABŞ Ordusunun (Quru Qoşunlarının) katibi Daniel Driskoll Prezident Donald Trampla görüşərək istefa ərizəsini təqdim edib. “The Hill” və “The Wall Street Journal” nəşrlərinin məlumatına görə, Driskollun istefası Müdafiə naziri Pit Heqsetlə aralarında aylardır davam edən fikir ayrılıqları və gərginlik fonunda baş verib.
Ağ Evin mətbuat katibinin müavini Anna Kelli məsələni təsdiqləyərək Driskollun fəaliyyətini yüksək qiymətləndirib: “Katib Driskoll Prezident Trampın “Amerikanı Yenidən Böyük Et” planının Ordu Departamentində irəlilədilməsində çox təsirli olub. O, tarixi hərbi əməliyyatlar zamanı döyüş hazırlığına və atəş gücünə xüsusi diqqət yetirərək müstəsna liderlik nümayiş etdirib, eləcə də Rusiya ilə Ukrayna arasında danışıqları dəstəkləyib. Ali Baş Komandan və Müdafiə Katibi ilə birlikdə gördüyü işlər sayəsində ABŞ ordusu həmişəkindən daha güclüdür”.
Mənbələrin verdiyi məlumata görə, Driskollun gedişinin əsas səbəblərindən biri Müdafiə naziri Pit Heqsetin Ordunun Baş Qərargah rəisi general Rendi Qorcu və digər yüksək rütbəli generalları vəzifədən kənarlaşdırması və dron proqramlarının transformasiyasına mane olması olub.
Driskollun Pentaqonu tərk etməsi ABŞ Quru Qoşunlarını həm mülki, həm də hərbi rəhbərlik dərəcəsində Senat tərəfindən təsdiqlənmiş lidersiz qoyur. İstefanın 7 sentyabr Əmək Gününə qədər baş tutacağı gözlənilsə də, proses daha tez reallaşıb.
İzmedia.az
