“The War Zone” nəşrinin ABŞ Hərbi Hava Qüvvələrinin (USAF) nümayəndəsinə istinadən verdiyi məlumata görə, ABŞ Avstraliya ilə birgə ilk dəfə yeni “HACM” (Hypersonic Attack Cruise Missile) hipersəs kreyser raketinin sınaq uçuşunu uğurla həyata keçirib.
Sınaq uçuşu Avstraliya Kral Hərbi Hava Qüvvələrinin (RAAF) iştirakı ilə xüsusi poliqonda — ehtimallara görə Vumera (Woomera) təlim mərkəzində baş tutub. Rəsmi mənbələr sınağın dəqiq tarixini, yerini və hansı daşıyıcı təyyarədən buraxıldığını məxfilik səbəbindən açıqlamayıblar.
Raketin texniki göstəriciləri və xüsusiyyətləri:
-
Quruluşu: İki mərhələli raket əvvəlcə bərk yanacaqlı sürətləndirici blokla ayrılır, daha sonra hipersəs reaktiv mühərriki (scramjet) işə düşərək müstəqil uçuşu davam etdirir.
-
Manevr qabiliyyəti: Raket əleyhinə müdafiə (RƏM) sistemlərinin aşkarlamasını çətinləşdirən yüksəkliklərdə manevr etmək imkanına malikdir.
-
Uçuş göstəriciləri: Dizayn hesablamalarına əsasən, raketin uçuş məsafəsi 500 km, sürəti isə təxminən 7 Mah (Mach) təşkil edir.
-
Daşıyıcılar: Yığcam ölçüləri sayəsində raket yalnız strateji bombardmançılara deyil, F-15E “Strike Eagle” və F/A-18F “Super Hornet” kimi çoxməqsədli qırıcılara da inteqrasiya edilə bilir.
Mütəxəssislər qeyd edirlər ki, sınaqları əvvəlcə 2024-cü ilə, daha sonra 2025 və 2026-cı illərə təxirə salınan “HACM” proqramı üçün bu uçuş vacib mərhələdir. ABŞ Hərbi Hava Qüvvələri 2027-ci ilin sonunadək raketlərin ilkin seriyalı istehsalına başlamağı planlaşdırır.
İzmedia.az
