ABŞ Energetika Nazirliyinin aylıq hesabatına görə, Amerika Birləşmiş Ştatları 2025-ci ildə 5,507 trilyon kub fut (təxminən 156 milyard kubmetr) mayeləşdirilmiş təbii qaz (LNG) ixrac edib, bu da tarixdə rekord göstəricidir.
Hesabata görə, ixracatın təxminən 68%-i Avropaya yönəlib. ABŞ-dən Avropaya tədarük 106,6 milyard kubmetr olub, Asiyaya isə təxminən 27,3 milyard kubmetr çatdırılıb, bu da ümumi ixracın 17,5%-ni təşkil edir. Nəticədə Avropaya tədarük əvvəlki ilə nisbətən 63% artıb, Asiyaya isə 37% azalıb. Amerikanın Afrikaya ixracı isə dörd dəfə artaraq 12,6 milyard kubmetr təşkil edib.
Ən çox LNG idxal edən ölkələr arasında Hollandiya (18,3 milyard kubmetr), Fransa (15,1 milyard kubmetr), Misir (12,3 milyard kubmetr), İspaniya (10,6 milyard kubmetr) və Böyük Britaniya (10,5 milyard kubmetr) yer alıb. Bu beş ölkə ABŞ-ın ümumi ixracının 43%-ni təşkil edir.
2025-ci ilin dekabrında ABŞ 569,3 milyard kub fut (təxminən 16,1 milyard kubmetr) LNG ixrac edib, bu isə əvvəlki ayla müqayisədə 8,4%, 2024-cü ilin dekabrı ilə müqayisədə isə 38,6% çoxdur. Dekabr ayında 168 tanker mayeləşdirilmiş təbii qazla yüklənib.
Hesabatda qeyd olunur ki, dekabr ayında Asiyaya tədarükün payı 12%-ə düşüb, Avropaya tədarükün payı isə 76%-ə yüksəlib. Qalan həcmlər Latın Amerikası və Afrika ölkələrinə ixrac olunub.
İzmedia.az
