ABŞ Dövlət Departamentinin açıqlamasında bildirilir ki, ABŞ hökuməti Konqo Demokratik Respublikasında (KDR) və Uqandada Ebola epidemiyası ilə mübarizə aparmaq üçün təxminən 50 müvəqqəti tibb müəssisəsinin tikintisini maliyyələşdirəcək.
Sənəddə qeyd olunur: “Amerika Birləşmiş Ştatları Konqo Demokratik Respublikası və Uqandanın ən çox təsirlənən ərazilərində 50-yə qədər səhiyyə müəssisəsinin açılmasını və əlaqədar xərcləri maliyyələşdirməklə Ebola ilə mübarizəyə sürətli dəstək verməyə sadiqdir”.
Müvəqqəti xəstəxanaların yalnız xəstələrə tibbi yardım göstərməsi deyil, həm də yerli əhali arasında virusun sürətli aşkarlanmasına dəstək verməsi nəzərdə tutulur.
Ebola virusu vəhşi heyvanlardan insanlara keçən infeksiyadır. Xəstəliyin ilkin simptomlarına qızdırma, baş ağrısı, əzələ və boğaz ağrısı daxildir. Daha sonra böyrək və qaraciyər funksiyasının pozulması müşahidə olunur, bəzi hallarda isə daxili və xarici qanaxmalar baş verə bilər.
Ebola virusuna ilk yoluxma halı 1976-cı ildə indiki Konqo Demokratik Respublikasında qeydə alınıb. Ən geniş yayılmış epidemiya isə 2014–2016-cı illərdə Qərbi Afrikada — Qvineya, Liberiya və Syerra-Leone bölgələrində baş verib və həmin dövrdə ölənlərin sayı 11 mini ötüb.
İzmedia.az
