Çin silahlı münaqişənin bütün Fars körfəzi bölgəsinə yayılmasından dərin narahatlıq hissi keçirir və hərbi əməliyyatların dərhal dayandırılmasına çağırır.
İzmedia.az xəbər verir ki, bu barədə Çinin Yaxın Şərq üzrə xüsusi elçisi Çay Cun Əbu-Dabiyə səfəri zamanı BƏƏ Baş nazirinin müavini və xarici işlər naziri Abdullah bin Zayed Al Nahyan ilə görüşündə bildirib.
China Central Television-in məlumatına görə, Çay Cun çıxışında deyib: “Çin tərəfi müharibə alovlarının hazırda bütün Fars körfəzi bölgəsinə yayılmasından dərin narahatlıq keçirir. Biz həmişə inanırıq ki, Fars körfəzinin bütün ölkələrinin suverenliyinə, təhlükəsizliyinə və ərazi bütövlüyünə hörmət edilməlidir və mülki şəxslərə və qeyri-hərbi hədəflərə edilən hər hansı hücum pislənilməlidir”.
BƏƏ-nin xarici işlər naziri bildirib ki, Əbu-Dabi silahlı münaqişənin tərəfi deyil və regionda sülhü daim müdafiə edir, “hücuma məruz qalmamalıdır”. O həmçinin Çin tərəfinə əminlik verib ki, BƏƏ öz ərazisindəki Çin vətəndaşları və qurumlarının təhlükəsizliyini təmin etmək üçün bütün lazımi tədbirləri görəcək.
Səfər çərçivəsində Çay Cun həmçinin BƏƏ Prezidentinin Çin üzrə xüsusi elçisi Xaldun Al-Mubarak ilə ikitərəfli münasibətlərin inkişafı ilə bağlı danışıqlar aparıb.
İzmedia.az
