Financial Times qəzetinin məlumatına görə, Avropa İttifaqı Macarıstanda seçkilərdə qalib gələn Tisza Partiyasının lideri Peter Magyardan Budapeştin Ukraynaya 90 milyard avroluq kredit və Rusiyaya qarşı yeni sanksiya paketinə qoyduğu vetonu aradan qaldırmasını gözləyir.
Avropalı diplomatlar hesab edirlər ki, bu addım Macarıstanın Aİ ilə münasibətlərinin normallaşdırılması üçün əsas şərtlərdən biri ola bilər.
Qəzetin yazdığına görə, Brüssel Macarıstan üçün nəzərdə tutulan 35 milyard avro məbləğində Aİ vəsaitinin dondurulmasının aradan qaldırılmasını yeni hökumətin yerinə yetirməli olduğu 27 şərtlə əlaqələndirir. Bu şərtlərə korrupsiya ilə bağlı yoxlamalar, həmçinin Baş nazir Viktor Orbanın sığınacaq axtaranlara münasibət və akademik azadlıqla bağlı qərarlarının Aİ qaydalarına uyğunlaşdırılması daxildir.
Aİ rəsmilərindən biri bildirib: “Bizim tərəfimizdə ciddi təsir imkanları var. Ona təzyiq göstərilir və o, tez nəticə əldə etməyə çalışır”.
Digər bir mənbə isə qeyd edib ki, “təcili addımlar planlaşdırılmır, lakin yeni hökumətin vəsaitlərə çıxış əldə etməsi üçün yerinə yetirməli olduğu uzun bir şərtlər siyahısı var”.
Xatırladaq ki, Macarıstanın Tisza Partiyası 12 aprel parlament seçkilərində qalib gələrək 199 yerlik parlamentdə 138 mandat qazanıb.
İzmedia.az
