Ukrayna ordusunun keçmiş baş komandanı, hazırda Böyük Britaniyada səfir vəzifəsində çalışan Valeri Zalujnı müasir müharibənin gedişini təhlil edərək texnoloji inkişafların ənənəvi hərbi əməliyyatların aparılmasını ciddi şəkildə məhdudlaşdırdığını bildirib.
Zalujnı qeyd edib ki, elmi-texnoloji tərəqqi səbəbindən əməliyyat səviyyəsində klassik hərbi tapşırıqları yerinə yetirmək artıq əvvəlki kimi mümkün deyil. Onun sözlərinə görə, bu gün döyüşlərdə bir il davam edən şəhər və ya yaşayış məntəqələri uğrunda mübarizələr əməliyyat göstəricisi kimi qiymətləndirilmir.
O əlavə edib ki, əməliyyat səviyyəsində uğur qısa müddətdə 150–250 kilometr dərinlikdə irəliləyiş əldə etmək deməkdir, lakin hazırkı şəraitdə bu cür nəticələr artıq reallıqdan uzaqdır.
“Döyüş meydanı artıq şəffafdır”
Zalujnı bildirib ki, həm Ukrayna, həm də Rusiya eyni məhdudiyyətlərlə üzləşir və heç bir tərəf sürətli və dərin hücum əməliyyatları üçün böyük qüvvələr toplaya bilmir.
“Eyni məhdudiyyətlər Rusiyaya da aiddir. Onlar qüvvələri cəmləşdirə və ya sürətli dərin zərbə qrupu yarada bilmirlər. Texniki baxımdan bu artıq mümkün deyil. Döyüş meydanı ‘şəffafdır’ – görünən hər kəs dərhal aşkarlanır və hədəfə alınır”, – deyə o bildirib.
Zalujnı mövcud vəziyyəti ənənəvi cəbhə döyüşlərinin yerini daha çox uzaq məsafədən idarə olunan və texnologiyaya əsaslanan qarşıdurmaların aldığı durğunluq mərhələsi kimi xarakterizə edib.
İzmedia.az
