İzmedia.az xəbər verir ki, Nyu-Yorkun sabiq meri və ABŞ prezidentinin keçmiş vəkili Rudy Giuliani Floridada təcili xəstəxanaya yerləşdirilib. Onun vəziyyəti kritik, lakin stabil olaraq qiymətləndirilir. Hospitalizasiyanın səbəbi açıqlanmasa da, siyasətçinin ötən yay baş vermiş yol-nəqliyyat qəzasından sonra ciddi sağlamlıq problemləri yaşadığı bildirilir.
81 yaşlı Cülyani bazar günü xəstəxanaya aparılıb. Bu barədə onun nümayəndəsi Ted Qudman sosial şəbəkədə məlumat verib. Onun sözlərinə görə, tərəfdarlarının “əfsanəvi mer” adlandırdığı Cülyani hazırda həyat uğrunda mübarizə aparır.
Nümayəndə konkret diaqnoz və yerləşdirildiyi tibb müəssisəsi barədə məlumat verməkdən imtina edib. 1994–2001-ci illərdə Nyu-York meri olmuş Cülyani sərt cinayətkarlıqla mübarizəsi ilə tanınır, lakin son illərdə siyasi və hüquqi qalmaqalların mərkəzində olub.
Hadisəyə ABŞ prezidenti Donald Trump dərhal reaksiya verib. O, Cülyanini “əsl döyüşçü” və “Nyu-York tarixinin ən yaxşı meri” adlandırıb.
Truth Social platformasında paylaşım edən Tramp baş verənləri siyasi təzyiqlərlə əlaqələndirib və demokratları sərt tənqid edib. O bildirib ki, “sol radikal demokratlar” Cülyaniyə qarşı ədalətsiz davranıblar və bunun ölkəyə də zərər verdiyini iddia edib.
Tramp həmçinin 2020-ci il prezident seçkilərində saxtakarlıqlarla bağlı iddialarında Cülyaninin haqlı olduğunu bir daha vurğulayıb.
Qeyd edək ki, bu, Cülyaninin son aylarda ilk təcili hospitalizasiyası deyil. 2025-ci ilin avqustunda o, New Hampshire ştatında ağır yol qəzasına düşmüşdü. Həkimlər onda döş fəqərəsinin sınığı, çoxsaylı yaralar və ətraf zədələri aşkarlamışdı.
Qəzadan sonra Cülyani əlil arabasında hərəkət etsə də, 11 sentyabr anım tədbirlərində iştirak etmişdi. Onun komandası tərəfdarları tezliklə sağalması üçün dua etməyə çağırıb.
