Böyük Britaniyanın Baş naziri Keir Starmerin ofisi bildirib ki, Yaxın Şərqdəki vəziyyət və Hörmüz boğazının bağlanmasının nəticələri 4 may tarixində Yerevanda keçiriləcək Avropa Siyasi Birliyinin (EPC) sammitində əsas müzakirə mövzularından biri olacaq.
Baş nazirin ofisinin açıqlamasına görə, Starmer sammit çərçivəsində liderlərlə boğazda uzunmüddətli təhlükəsizliyin təmin edilməsi, artan borc risklərinin qarşısının alınması, iqtisadi sabitliyin qorunması və davam edən münaqişələrin daxili gərginliyi artırmamasına dair məsələləri müzakirə edəcək.
Müzakirələrin ötən ay Parisdə keçirilən “Hörmüz Boğazında Dəniz Gəmiçiliyinin Azadlığı Təşəbbüsü” sammitində qaldırılan mövzular əsasında aparılacağı bildirilib. Həmin görüşdə Birləşmiş Krallıq və Fransa boğaz boyunca naviqasiya azadlığının qorunması üçün çoxmillətli missiyaya rəhbərlik etməyə razılaşmışdı. Lakin bu missiyanın yalnız münaqişə başa çatdıqdan sonra həyata keçirilməsi nəzərdə tutulur. Starmer həmin təşəbbüsü daha əvvəl “tamamilə müdafiə və sülh xarakterli” kimi qiymətləndirmişdi.
Sammitdə Ukraynadakı münaqişə də müzakirə olunacaq. Buraya Böyük Britaniyanın Ukraynaya ayrılan 90 milyard avroluq kreditdə iştirakı və münaqişə bitdikdən sonra Ukraynaya Britaniya və Fransa sülhməramlılarının göndərilməsi məsələsi daxildir.
Qeyd edək ki, Avropa Siyasi Birliyinin ilk zirvə toplantısı 2022-ci ilin oktyabrında Praqada keçirilib və 44 ölkəni bir araya gətirib. Bu platforma Avropa İttifaqı tərəfindən Rusiyaya qarşı koordinasiya və siyasi dialoq məqsədilə yaradılıb. Birlik çərçivəsində keçirilən görüşlərdə adətən rəsmi qərarlar qəbul edilmir, əsasən dövlət və hökumət başçıları arasında müzakirələr aparılır.
İzmedia.az
