İzmedia.az xəbər verir ki, İranın xarici işlər naziri Abbas Əraqçi Pakistanla aparılan danışıqlarda irəliləyiş olduğunu bildirərək ABŞ-ı “pis niyyətli tərəflər tərəfindən qarışıqlığa cəlb olunmamaq” barədə xəbərdar edib.
Əraqçi X sosial şəbəkəsində Hürmüz boğazı ilə bağlı açıqlamasında qeyd edib ki, regiondakı vəziyyət siyasi böhrana hərbi həllin olmadığını göstərir.
Onun sözlərinə görə, Pakistanın səyləri nəticəsində danışıqlar davam etdiyi bir vaxtda ABŞ və Birləşmiş Ərəb Əmirlikləri ehtiyatlı olmalıdır.
İran XİN rəhbəri ABŞ Prezidenti Donald Trampın Hürmüz boğazında çətin vəziyyətdə olan gəmilərin keçidi üçün irəli sürdüyü “Azadlıq Layihəsi” təşəbbüsünü tənqid edərək bildirib: “Azadlıq Layihəsi, əslində, dolaşıq bir layihədir.”
Məlumata görə, ABŞ Prezidenti Donald Tramp 4 may tarixindən etibarən Hürmüz boğazında ilişib qalan və Orta Şərqdəki böhranla birbaşa əlaqəsi olmayan ölkələrə məxsus gəmilərin keçidinə yardım ediləcəyini və bu təşəbbüsün “Azadlıq Layihəsi” adlandırıldığını açıqlayıb.
ABŞ tərəfi əməliyyatın humanitar xarakter daşıdığını bildirərək bölgədəki vəziyyətlə əlaqəsi olmayan ölkələrin maraqlarının qorunacağını qeyd edib.
CENTCOM isə bu əməliyyata 15 min hərbi personal, 100-dən çox quru və dəniz vasitəsi, həmçinin idarə olunan raket esmineslərinin cəlb olunacağını açıqlayıb.
