Təqaüddə olan yüksək rütbəli amerikalı general Cek Kin bildirib ki, sülh danışıqlarının iflasa uğraması və Yaxın Şərqdə gərginliyin artması fonunda ABŞ İrana qarşı “tammiqyaslı döyüş əməliyyatlarını” bərpa etməyə yaxınlaşır.
İraq və Əfqanıstan müharibələrinin başlanğıcında ABŞ ordusunun Baş Qərargah rəisi vəzifəsində çalışmış Kin bu barədə Fox News kanalına müsahibəsində danışıb.
Onun sözlərinə görə, İranın ABŞ Prezidenti Donald Trampın sülh təkliflərini rədd etməsindən sonra ABŞ və İsrail 8 aprel atəşkəsindən bəri toplanmış kəşfiyyat məlumatlarına əsaslanaraq əməliyyatları yenidən başlada bilər.
“Bu, ABŞ–İsrail birgə əməliyyatı olacaq, tammiqyaslı, məhdudiyyətlər olmadan,” – deyə o bildirib.
General əlavə edib ki, atəşkəsdən sonra Tramp diplomatik həll üçün “böyük səbir” nümayiş etdirib, lakin hazırkı mərhələdə razılaşma ehtimalı zəif görünür.
Kinin iddiasına görə, ABŞ İranın hərbi imkanları barədə dəqiq məlumatlara malikdir və əvvəlki əməliyyatlar nəticəsində hədəflərin təxminən 70%-i sıradan çıxarılıb.
Onun sözlərinə görə, növbəti mümkün hədəflərə İranın raket və nüvə proqramları ilə bağlı obyektlər, eləcə də hərbi infrastruktur daxil ola bilər.
O həmçinin bildirib ki, ABŞ İranın əsas gəlir mənbələrinə də zərbələr endirə bilər və Hörmüz boğazı ətrafında gərginlik bu planlara təsir edir.
Kin iddia edib ki, İran Hörmüz boğazında yaranacaq böhranın ABŞ-ı hərbi kampaniyanı dayandırmağa məcbur edəcəyinə ümid edir, lakin Vaşinqton bunun qarşısını almağa hazırdır.
Generalın açıqlamaları Trampın İranın tezliklə sülh sazişinə razılaşmalı olduğunu, əks halda ciddi nəticələrlə üzləşəcəyini bildirməsindən sonra yayılıb.
İzmedia.az
