The New York Times və Bloomberg nəşrlərinin məlumatına görə, Meta şirkəti işçi heyətinin təxminən 10%-ni, yəni 8 minə yaxın əməkdaşını ixtisar edib. Eyni zamanda, daha 7 min işçinin süni intellektlə əlaqəli yeni istiqamətlərə yönləndiriləcəyi bildirilir.
Məlumata görə, əməkdaşlar səhər saatlarından etibarən ixtisar bildirişləri almağa başlayıblar. Onlara daha əvvəl kütləvi ixtisar günündə evdən işləmələri tövsiyə olunmuşdu.
Şirkətin ofislərində olan bəzi əməkdaşlar isə yeni strategiyaya qarşı etiraz xarakterli materiallar aldıqlarını bildiriblər. Bu materiallarda, o cümlədən süni intellekt sistemlərinin öyrədilməsi üçün əməkdaşların ekran məlumatlarının toplanması ilə bağlı sualların yer aldığı qeyd olunub.
Bloomberg mənbələrinin sözlərinə görə, ixtisarlar əsasən mühəndislik və məhsul hazırlayan qrupları əhatə edib. İşdən çıxarılan əməkdaşlara ən azı 16 həftəlik əsas əməkhaqqı, tibbi təminat və karyera dəstəyi xidmətlərini əhatə edən kompensasiya paketləri təqdim ediləcək.
Məlumata əsasən, bu restrukturizasiya Meta-nın süni intellekt infrastrukturu üçün 100 milyard dolları aşan investisiyaları fonunda həyata keçirilir.
Şirkət daxilində çıxışı zamanı Mark Zukerberq bu il əlavə genişmiqyaslı ixtisarların planlaşdırılmadığını bildirib və şirkətdaxili kommunikasiyanın təkmilləşdirilməsinin vacibliyini vurğulayıb.
İzmedia.az
